“Ou te faatusaina le lotu i se asikulimi, e eseese feleiva e fia taumamafa ai tagata ae tasi lava le auga e taunuu i ai”
Ua fitu aulotu o le ekalesia Papatiso (Babtist Church) ua i Samoa ma o le lona fitu o ia aulotu fou na aloaia lona faatuina i se sauniga i le Aso Faraile, 6 o Ianuari 2012 i Nuu, o se nofoaga ua ainā ma nofoia e nisi o aiga, aemaise e tu lata le aulotu fou i le lotoā o loo iai le nofoaga o suesuega tau faatoaga a le Malo o Samoa. Na amata le lotu ia Iuni o le tausaga ua mavae 2011 i aiga e toafā. O le taimi nei ua 18 aiga lotu ae o le numera o tagata tapuai ua lata i le toa selau.
O se faailoga lea o le vave ola ma tupu o lea aulotu e lei leva ona faatu le ekalesia Papatiso i Samoa, ae e faamalumalu i ai le pulega o le ekalesia i Niu Sila, e pei ona fuafua o se tasi o faafeagaiga mai Niu Sila le susuga Faapale Seupule ma lona faletua o le a tausia. O loo galulue nei le faifeau ma lona aiga i le ekalesia Papatiso i Wainuiomata i Ueligitone, ae o le amataga o le faaiuga o le tausaga nei ua fuafua e siitia mai ai i Samoa mo le tausia o le aulotu a Nuu Fou.
O se tasi lea o tapuaiga kerisiano i Samoa ua iai le talitonuga ua vave ona ola ma tupu pe a fua i le iai o ekalesia i Asau ma Salelologa i Savaii, o Falelauniu, Falemauga, Tuanai, Fagalii, ma Leonē, ma le lotu ua faatuina i Nuu Fou. O le faatinoga o tapuaiga a le ekalesia e pei ona faaalia e le susuga i le faifeau o Faapale, e saoloto e pei ona faapenetekoso le faiga o lotu a nisi o ekalesia, ae o isi e mulimulitaia pea faiga faaekalesia faapotopotoga poo le congregational format.
O Nuu Fou e faapenetekoso ma e leai lava se eseesega ma le faiga o isi lotu e pei o le Assembly of God, auā e pepese ma pati ma leo tetele e ave le viiga i le Atua. “O le ā sau silasila faafaifeau i mafuaaga o le toatele o tagata Samoa ua agai i tapuaiga faapenetekoso”?
O le fesili tuusa‘o lea i le susuga Faapale, auā o le mea moni ua sili ona tumutumu tapuaiga faapea i tupulaga talavou ma le aumatutua auā o aso ma tausaga ua alu, sa pei e lē toatele se au matutua i tausaga o le soifua e tapuai i lotu faapenetekoso.
“Ou te iloa e pei lava le lotu o le aisikulimi, e tofu le tagata ma le feleiva e manao i ai.
O isi e fiafia i le sukalati, o isi o le banana, a o isi o le vanilla”.
O le faalauteleina o le finagalo o le faafeagaiga na ia ta‘ua ai, e faapena lana vaai i le tupu ma le ola a le ekalesia Papatiso, ona o le tagata tapuai ma talitonu i le Atua, e eseese lava vaega o le olaga talitonu e fetaui ma lona manaoga e tapuai saoloto ai.
O le faatuina aloaia o le aulotu o Nuu Fou na faauuina ai ma nisi o tofiga e pei o le toeaina ma tiakono.
O sui ua faauu ua ave i ai le vaaiga o le ekalesia mo le taimi nei seia oo ina osi le feagaiga ma le susuga Faapale Seupule i le amataga o le tausaga fou.
Sa auai sui o isi ekalesia Papatiso i Samoa i le faatuina o le aulotu a Nuu Fou, ma o le susuga i le toeaina Lototau Seumanu o loo tausia le ekalesia i Salelologa, na saunia le lauga ma le upu na avea ma matua o le faamoemoe o le ekalesia ma le aulotu fou.
