21 Tausaga o le Pasifika Festival i Aukilani

‘O au measina o tofi mai le Atua, ia faapelepele ma tausi lelei’, o le sini autu o le faamoemoe, Polyfest nuu a Samoa, i lenei tausaga.

O le tausaga lona 38 lenei o le Polyfest a aoga, kolisi maualuluga i Aukilani talu ona faavae i le 1976 i le faaaliga muamua sa faia i le aoga a Hillary College i Otara. E na o le fā(4) aoga sa amataina lenei tuufaatasiga ma le faamoemoe o se avanoa e toe fafagu ai tu ma aganuu a atunuu Polenisia i totonu o kolisi maualuluga, e ala i le faatinoina e le fanau aoga o siva ma pese faaleaganuu, o tautalaga, ma ia faamanatu ai i le fanauaoga le tupuaga o tuaa, aemaise le tāua o le galulue ma le tuufaatasi o aoga e fefaasoa‘ai le iloa i tu ma aganuu na tupuga mai ai. Na tau atinae mai i se amataga faatauvaa e faatupe e mātua, faiaoga ma le fanauaoga, a ua avea nei ma faamoemoe telē e tulimataia e aoga ma tagata uma i Aukilani.

E ono nuu sa vaevaeina i ai le Polyfest, o Maori, Cook Islands, Diversity Stage o le nuu e  tuufaatasi ai atunuu eseese e aofia ai Korea, Initia, Saina, o le nuu a Niue, Tonga ma Samoa. Silia ma le valu afe o tamaiti aoga na auai ma fai ma sui o latou aoga taitasi i le Polyfest o lenei tausaga, ae lē mafaitaulia ai le afe ma afe o le au tapuai ma le au lagolago na molimauina le tauvaga o le 2013. E fā aso na faagasolo ai le faamoemoe mai le aso 13 o Mati, i le sauniga faapitoa na sisiina a‘e ai tagavai o atunuu eseese ma tatalaina aloaia ai le Polyfest, seia oo lava i le Aso Toonai 16 o Mati na tapunia ai i laugatogi o tauvaga a aoga i nuu taitasi.

O le nuu a Samoa na maitauina le mafuli i ai o le saofaiga a le au taupuai i le lē gaee o le au matamata i le aso mulimuli i le fia molimauina o faafiafiaaga eseese ma taumafaiga a le fanau aoga. O le tausaga nei, e tolusefulu kolisi eseese na auai ma tauva i le nuu a Samoa, ae o le Aso Tofi na tatala ai le faaaliga o tu ma aganuu i le tauvaga o tautalaga a sui tauva o aoga taitasi.

O le faaiuga la o tautalaga taitasi o le Polyfest 2013: manumalo i le tauvaga a le Tausaga Iva (Year 9) o Povila Simi mai Tangaroa College; Tausaga Sefulu (Year 10) o Tusitala Pasolo mai Sir Edmund Hillary Collegiate; Tausaga Sefulutasi (Year 11) o Christopher Satuala Oleva mai St. Peters College; Tausaga Sefululua (Year 12) o Iakopo Vaifale o Tangaroa College, ma le Tausaga Sefulutolu (Year 13) na manumalo ai Manuao Tiatia o le Mangere College.

O le vaega lona lua o tauvaga tautalaga faa-Samoa i le Polyfest, o Tautalaga lē Saunia, poo le vaega lea, faatoa iloa lava le autū e lauga faatatau i ai, pe a oo i le aso o le tauvaga. E maeu foi le tomai ma manatu faaalia o le fanau aoga na tauva i lea ituaiga tauvaga. Peitai i le faaiuga na tulaga tolu ai Salome Wright mai le Mangere College; tulaga lua o Soketi Afoa o le Papatoetoe High School, ma le siamupini o lenei tausaga, o Faasega Malamū o Wesley College.

O le tauvaga o le Polyfest na vaevaeina lava i Aoga Teine, Aoga Tama ma Aoga Tuufaatasi o tama ma teine. O aiaiga sa taiala ai le faamasinoina o le tauvaga ma faailoga e lautogia ai le aoga, e aofia ai le Ulufale, Ulufafo, Pese o le Aso ma le Fuataimi, o le Sāsā ma le latou Faaluma, Ma‘ulu‘ulu, Taualuga ma le Taupou atoa ai ma togi o le aoga e matagofie le Togiga.

E lei faigofie le galuega a faamasino, auā na leai se aoga na alo tamala i tapenapenaga ma sauniuniga o le faamoemoe, e lē taumate le afu lelea ma le tigaina o le taimi na tuufaatasi ai siva ma faafiafiaga a le fanau aoga, e maeu le matagofie, e leai se aoga na faaletonu se tapenaga. O nisi o le aufaamasino o le Afioga Tofaeono Tanuvasa Tavale, Afioga Muliagatele Vavao Fetui, Susuga Fagu‘ele Suaalii, Susuga Ben Taufua, Faletua Manu Faaea-Semeatu ma le susuga i le Faletua Vini Lale Peteru. O faauluuluga ma nisi o le Komiti Faafoe o le nuu a Samoa, Toesulu Brown ma Melegalenuu Ah Sam, Miss Tagi Sooa‘emalelagi o le Fofoga o le aso.

O le tausaga nei ua toe talimalo pe host ai le foi e le aoga a Manurewa High School, sosoo ai nei tausaga o faafoe e Manurewa le nuu a Samoa, peitai o le aoga foi lea ua sola ma le manumalo i le aotelega o togi tuufaatasi o aoga a tama ma teine i lenei tausaga, le aoga Manurewa High School.

E ui e lei mautulaga le aoga Otahuhu College i le faaiuga o le aotelega o togi a aoga tuufaatasi, peitai na mautulaga i nisi o faailoga, e pei o le tulaga lua i le pese ulufale, tulaga tolu i le pese ulufafo, ma nisi faailoga aemaise le mataina o le taumafaiga a alo ma fanau i lenei foi tausaga.

E iai le faailoga faapitoa na saili i ai le aoga pito i lelei le tuufaatasiga ma le maopoopo o tapenaga, atoa ai ma le amio pulea poo fea lava le nofoaga e faatasitasi ai sa tulimatai lava e sui o le komiti, na mauaina lea e le aoga a le Sacred Heart College.

O le iuga o le tauvaga o le Polyfest Nuu a Samoa 2013