E masani i tausaga uma ona tuu atu ni sikolasipi e aooga fua ai tamaiti mai Kolisi i le Politekinika a Whitireia. Na oo atu lava i le 24 sikolasipi na ofoina i nai tausaga ua mavae, peitai i lenei tausaga e 13 ni sikolasipi na faamanuiaina ai ni sui sa alualu i luma le atamai i mataupu na aoaoina ai.
O le Aso Lua na tea nei na faia ai se sauniga e faailoga ai le fiafia o le Politekinika e talia i latou nei e 13 mai Kolisi maualuluga i le itumalo o Ueligitone.
E toatasi se tamaitai Maori mai se kolisi i totonu o Otaki, ae o le isi 12 e mai kolisi o le itumalo lava o Ueligitone.
O le kolisi o Aotea na o mai ai ni tamaitai e toalua, o le toatasi o laua o se alo o Samoa, o Ariel Baker, ma o loo ia aoaoina le faafaiaoga (Early Childhood Education). O isi sikolasipi na maua mai i kolisi a Newlands, Onslow, Porirua, ma Manga.
O le faafomai e 2, faafaiaoga e 4, faafiafia (Performing Arts) e 2, faapisinisi e 2, ma le au galulue i taavale a falemai (paramedics) e 3. O loo ua amata ona aoaoina nei i latou ia latou mataupu ma ua faaalia lo latou fiafia i le aoga.
Na saunoa faafetai le pule o Whitireia le susuga ia Don Campbell faatasi ai ma sui pule e toalua na auai, ona faasolo loa lea o le faailoa mai o tamaiti sikolasipi o latou igoa ma aoga na
omai ai.
Na faaiu i se taumafataga māmā na tali ai le sua a taiulu o le Politekinika, faapea faiaoga ma tamaiti uma na faamanuiaina i sikolasipi e aooga fua ai i le aoga.
O le pili e $4000 ma ona tupu i le tausaga ma e tusa e 3 tausaga e aooga fua ai nei tama ma teine i le sailia o latou faailoga i Whitireia.
