16 tausaga i le toese, faamalosi lona lava afafine moni

O loo saoasaoa pea le sosolo o faiga solitulafono i faiga faamalosi ua aafia ai fanau teine a le atunuu aemaise i le va o tama ma o latou alo tamaitai laiti. E le o sau i lalo ae oso maualuga pea le aofai o nei solitulafono e oo atu i leoleo ma taualuga i suesuega atili a le faamasinoga maualuga. E faapena foi la se isi mataupu na fofogaina i le vaiaso ua mavae lona faaiuga ua nofosala ai se tama 44 tausaga le matua i le falepuipui mo le 16 tausaga. E 13 moliaga o le faiaiga faamalosi (rape) ma moliaga e lua o le faia o ni faaoolima mataga (indecent assault) sa molia ai le ua faasalaina, ma sa ioe uma o ia i moliaga e 15. E 13 tausaga le matua o le afafine o le ua molia na ia faia i ai ia gaioiga solitulafono i le va o le masina o Aperila ma Aukuso o le tausaga ua mavae 2008.
O tolaulauga a leoleo i luma o le faamasinoga e tusa o le faaletonu na tupu, na manino ai le tele o se aafiaga na feagai ma le teineititi, e le gata o gaioiga a lona tama moni na faamalosi ai o ia ma faia ni faaoolima mataga, ae o le faamatauina pe faafefe i le faaoo i ai o le oti pe a ia tauina i se isi pe taumafai e sola ma lo latou aiga. O itu ogaoga ia na silasila i ai le faamasinoga i le faia o lana faaiuga. Ae o se isi tulaga na molimauina i lenei soligatulafono ona e faapea o le ua molia ma faasala i le falepuipui sa ola ma soifua ae i se siosiomaga i totonu o lona aiga na aafia ai se tasi o ona tuafafine i se faiga aiga na molia ai se tasi i le solitulafono o le mataifale poo le incest.
O le tama o le ua molia na ia faia lea gaioiga i lona afafine. Sa molimauina e le faamasinoga le toatele o le itupa o alii e aafia i ni soligatulafono e faapea o loo matauina ai o le faamasinoga lava e sulufai i ai tamaitai e aafia mo se vaifofo. Ua manatu ai le faamasinoga e ao ia i latou o faia tulafono poo faipule o le palemene ona toe iloilo nisi faasalaga talafeagai mo ia ituaiga o solitulafono. I le mataupu ua faasalaina ai le tama 44 tausaga i le 16 tausaga i le falepuipui, ua faapea ona tuuaia ai e le faamasino le tina o le teineititi ona o le leai o sana gaioiga vave na faia e taofia ai le solitulafono sa faia e le tamaloa poo lona toalua. O se tasi o gaioiga a le ua nofosala e faapea, a o faia se faiga aiga faamalosi ma lona afafine i se tasi o po, sa tei ane i luga lona atalii 10 tausaga le matua, peitai na otegia e le tamaloa ma faatonu e alu e moe.
O nisi o ana gaioiga sa faatino i le fale pe a leai le tina o le aiga, a o nisi gaioiga sa faia pe a o i uta o le faatoaga ma lona afafine. O se soligatulafono na iloa ma silafia e le tina ma sa iu ina vevesi ai ma lona toalua ma nonofo valavala ai le ulugalii ae tuua na o le teineititi na aafia ma se vaega o le la fanau. O aafiaga matuia o lagona o le teineititi i le mea na tupu na mafaufau ai lava i se tasi o aso e sili pe a pule i lona ola, e pei ona faamatala i le ofisa faanofo vaavaaia. Ae na maua se fesoasoani i ona lagona tiga ina ua le toe nofo i lo latou aiga. Ua tautino i le ofisa faanofo vaavaia e le toe fia vaai i lona tama moni i le lumanai, ma na te le toe fia mafaufau ma manatua gaioiga na faia ia te ia.