O le itu e fai ai sina ofo o le toatele o uo a le alii o Simaika, ona e le o se taimi muamua lea ua fai ai sana uo tamaitai, e le gata i lea, o se alii foi ua lava le tofa ma le utaga i le afioga a le Atua, e masani foi ona ia sasao ai i si alii talavou e faufautua i ai i le itu tau le sailia o ni paaga pe a sauni e faaipoipo.
Ae o lea ua tuufesilisili solo nei tagata, ae pe aisea lava na ia tuu ai fua i tala a isi tagata o le latou nuu, lea la ua mao ai fua oso fai lea faaipoipoga tele na fai nei ma le tamaitai mai le motu i Sasa‘e, ae o lenei la ua toe tigaina ai nei, aua ua toe foi lava le tamaitai lea i lona aiga, ae ua mafatia ai na o si alii o Samaika ma tausi le la tama lea e lei manao le tamaitai e alu ma ave.
E mafua ona ofo tagata, aua e faafuasei lava ona pa le tala o le a fai le faaipoipoga a le alii misionare o Samaika, ae o lea na faapea lava le nuu o Samaika lea ua sauni e malaga i Filipaina e faaauau ai lana misiona.
Na uma lelei lava faila o si tamaitai mai le motu i Sasae ona vaili uma e le au taulaitu vavalo o le nuu o Simaika, ma latou iloa ai, e lei atoa se tolu ni masina o le faigauo lea ua fai, a o lenei ua taupule le faaipoipoga. Foliga mai o se tasi o ulugalii o le nuu o Samaika, e masani ona malaga i Tutuila ma latou feiloai ai ma le tamaitai lea, ma o se tasi o vaega o faila na maua e le FBI, o lea tamaitai sa nonofo muamua ma se alii Korea e galue i luga o vaa, peitai o lea e tigaina si alii Korea e lau ane tupe e tausi ai le mafine i Pago Pago, ae ese le isi mea lea ua amata ona laulau tupe i ai le mafine.
O le ulugalii lea o le nuu o Simaika, e foliga mai ua mausali le latou faauoga ma le tamaitai mai le motu o fiafiaga, ma e tele foi sina seleni o loo fai ma la maua mai ai, fua lea o le magumagu o le ulugalii i lea tamaitai, ma ua mananao ai lava ia tatai mai le tamaitai i Upolu e lau mai ai seleni mo le faaolaolaina o le pisinisi a sia ulugalii. O si tama la o Simaika, o se tasi lea aiga e fai ma toa i ai pe a uma lana talaiga i le tele o aso.
O le faamoemoe o si alii e fia faasoa atu lana Tusi Paia i le ulugalii, ae i le taimi e tasi, o lea ua taavili solo le mafaufau o le fafine, i se auala e faapipii ane ai lana teine mai Pago, i si tama misionare.
O Simaika foi e ese le alofagia i totonu o le latou nuu, ona o se tasi o alii talavou e matauina lava i ona uiga faaaloalo ma le tamalii, aemaise i le va ma tagata matutua. Lona uiga, e taufai moomoo uma tagata, talosia ia faaipoipo Simaika i se tamaitai lelei, poo se afafine o se isi tamalii o se afioaga.
