$120,000 e totogi e Toluono mo fanua na ia ave faasolitulafono

O loo tuli le faasalaga faafalepuipui o le tofa Toluono Feti ona o moliaga ua faamaonia e le faamasinoga e faasino i lona faia o se gaioiga solitulafono i le aveesea o le fanua o le tina o Theresa Taufau Stowers.
O le faamasinoga i lea mataupu ua malie ai lea tamalii e toe faafoi le fanua o Theresa sa faamau ai lana aitalafu i le faletupe o le Samoa Commercial Bank i Apia. O se tasi o tina na aafia lona foi fasi fanua i lea gaioiga, o Rosita Stowers Burke ua leva tausaga o faamautu i Niu Sila ma lona aiga, ae sa iai pea lona fanua i Lotopa.
O le aafiaga o le fanua e afua mai i le liliuina o pepa o le tagata e umia poo le ownership lea na faatino e Toluono ma se tasi o tina e suafa ia Lisa Stowers, o ia na sainia le suafa o Rosita Burke i le liliuina o le fanua ina ua faatau e Toluono i le tau e $80,000.
Na toe faatau e Toluono le fanua lava lea i se isi tagata i le tau e $47,893 mulimuli ane ina ua mae‘a ona ia umia le fanua, ma ua lē talitonuina ai e le faamasinoga le tau e 80 afe o loo faaalia i pepa o faamaumauga o le liliuina o le eleele sa ia faaalau se valusefulu afe e faatau ai.
Na talosaga Rosita i le faamasinoga ina ia totogi atu e Toluono ni tupe, ona o lana gaioiga ua aveesea ai lona fanua, ma le tasi o itu o mafatiaga na feagai ma ia ina ua malaga mai i Samoa ma lona aiga, ae faateia ai i le agai atu i Lotopa ma iloa ai ua ese tagata ua fau lo latou fale ma nonofo i lona fanua.
Sa talosaga foi Rosita i le faamasinoga ina ia faia se faasalaga e tauia ai se amioga lē faamaoni ua faia e Toluono Feti, ma o le vaega lea o lana talosaga na teena ona e manatu le faamasinoga ua faasalaina nei Toluono i le faamasinoga i le falepuipui ma o le taui lea o lana gaioiga na fai.
E aliali mai i iloiloga o lenei mataupu sa feagai ma le afioga i le faamasino sinia o le Faamasinoga maualuga le afioga Lesatele Rapi Vaai e tele se faaletonu na aafia ai le fanua, e afua mai i le saini e Lisa o pepa e liliu ai, ma le tau e 80 afe na faatau ai e Toluono.
O le upu moni e pei ona faaalia e le alii faamasino, e lē o le tau moni lea na faatau ai pe a fua i le molimau a Lisa sa na o ni vaegatupe sa tuuina atu e Toluono ia te ia, ma teena ai le mau a Toluono sa ia totogi uma le fanua ia Lisa lea sa faia se la faanunumi poo se mafutaga faapouliuli.
O Lisa sa nofo i se tausoga o Rosita o lona faaiu o Stowers. Ua talia e le faamasinoga le totogi e lē na faasaga i ai le tagi o le $90,000 i le itu tagi mo special damages, ae $30,000 mo general damages. Ua le talia ai le talosaga a Rosita ma lana loia e totogi atu le $50,000 mo general damages. O le silasila a le faamasinoga ua talafeagai lelei le 30 afe tala.