Tuufaatasia taleni a Richard ma Parkers

Ua loa ona tautua Richard Parker i le taleni o le musika e pei ona lauiloa ai uso o lona tuaa ia Faasavalu Dave Parker faapea John Parker ua maliu.
E le taumate le unaia o le tuputupu mai o Richard i fatuga ma siufofoga mālie a nai ona ‘uncles’ i le taleni pese. Ua silafia uma e le au faafofoga le tutusa o leo o i latou nei e ui e eseese auga tupulaga.
O le toe malosi mai o le taumafaiga a Richard lea ua toe faafofoga i ai Samoa i nisi o pese tuai na usuina e Dave ma John i nisi o vaitau o le ogatotonu o le 1980 e manatua ai taimi o taaloga a le Pasefika i Samoa i le 1983.
O le vaitau foi lea o le malosi o le logologoā o Faasavalu i Niu Sila a o John Parker i Samoa.
O lenei  vaitau ua vaaia le tuufaatasia e Richard, o musika ma fatuga tuai nei a lona aiga ma suiga fou i nei ona po e pei o le ‘rap’ ma le ‘reggae’. E le gata o le toalua pea ma le alii rap ia Tony Alesana i ana faafiafiaga ma CD, ae ua amata foi ona tapena Richard mo le lumanai.
O le CD fou a Richard o loo pueina ma o loo fuafua e faailoa i le tausaga nei, e aofia ai se galuega faagasolo ma fanau a John Parker, le alii o Johnny Fernando Parker, ma le atalii o Dave Parker ia Poetik Tre Parker.
O se taimi muamua lenei ua galulue faatasi ai i latou e toatolu ma e uigasee foi siufofoga o nei alii.
Na faaalia e le susuga Richard Parker i le Samoa Times, o nai ona tei o le la malosiaga o le ‘rap’. E talitonu pe a tatala o la siufofoga pese i fatuga a o latou tuaa pe a toeitiiti.
O lenei faatasiga ua atagia ai le maopoopo o le taleni mo lenei augatupulaga. O le aso 20 o Aperila e malaga mai ai Richard Parker mai Melepone mo Sini i lana faafiafiaga e faia i Plumpton ma le  faaili iloga o le Moli o le Ava. O lea faaili e pulea e le susuga Iona Keti Magalo, ma e faatautaia e ona alo.
Na faafiafia i latou i le siva a le aulakapi malaga mai a Moataa na faia i le Poly Club i Liverpool, lea na siamupini i le Fitu i Melepone.
O se avanoa lelei lea o le a silasila ai ma faafofoga le atunuu i nei alii pese iloga.