Rev Kueva & Selesa Tuimaugapo
E moni lava e lelei ma alofa le Atua! Na leai se mea e gata mai ai le agaga faafetai ma le faamanū o le susuga i le tausi matagaluega ia Rev Kueva ma le faletua ia Selesa Tuimaugapo ma le ekalesia a Moreton Bay, ina ua tali faaaliali le Atua i lo latou faamoemoe sa fauao faupo.
Sa a‘e mauga ifo vanu, tele fita ma faigata ae maualuga le viiga o le Atua i Lona Aao taitai lea ua laasia ai le lima tausaga o le galuega.
O le Aso Toonai ua tuanai na faamanatuina ai le 5 tausaga o le Matagaluega ekalesia Metotisi a le Faasinoti i Moreton Bay lea o loo tausia e le susuga ia Rev Kueva Tuimaugapo o se lupe faalele mai Fagafau i le itu Salega, ma le faletua ia Selesa Tuimaugapo mai Malie,ma Tufutafoe.
O le afioga i le alii Sea ia Rev Halefoti Seloti Alainuuese sa taitaia le sauniga e pei ona auai mai le faletua ia Seuoletoi Alainuuese.
E toatele nisi sa auai e lē gata o le atunuu ae silisili le lagolago malosi e matagaluega a le faasinoti a Kuiniselani le ekalesia Metotisi.
O se avanoa faaauro lea na faapaiaina ai foi le maota fou ole galuega male faaili ale ekalesia. O le fofoga o le aso o le fetalaiga ia Levaopolo Tusani, tali faitau le fetalaiga ia Pasese mai Leulumoega e fai ma sui ole afioga i le Sea ma le paia i le Sinoti ma le auvalaaulia.
Na tauaaoina e le ekalesia le seleni paia e tusa ma le $103 afe tala e fesoasoani i le tele o meafai a le ekalesia aemaise foi nisi fuafuaga auā le lelei o le galuega a le Atua.
