Ua tuputupu pea le faatoateleina o le aiga o le tina ia Soonalote Asi Tanuvasa auā ua ova atu ma le onoselau tagata ua tutupu mai ia te ia.
O le Aso Faraile 20 o Setema na atoa lelei i ai le 100 tausaga o le tina matua, lea na faamanatuina ma molimauina e uo ma aiga uma i se mafutaga ma le sauniga na taitaina e le Susuga i le epikopo, Tauli Lealiifano i le Aso Toonai, aso 21 o Setema.
Ua 100 tausaga o le soifua o Soonalote, ae o loo maitauina pea le lelei atoatoa o lana faalogo ma lana vaai aemaise foi o le malosi i le tino auā na mae‘a lelei lava fuafuaga ma le polokalame o lona aso fiafia o auai pea Soonalote mai le amataga seia oo lava i le faaiuga o le faamanatuina o lona aso soifua.
E sefuluvalu alo o le tina, lima ua fai i lagi folauga ae e 13 o loo soifua mai pea ma o le ulumatua lava ua 82 ona tausaga.
Na matuā faatumulia lava le Marae i Weymouth Road i alo ma tamafanau a le tina matua aemaise o le auvalaaulia na mafai ona auai i le faamanatuina ma molimauina ai le matagofie o le alofa o le Atua i lana tausiga mo le tina matua.
Na auai foi le susuga ia Toaletai David Tua ma le afioga ia Taito Phillip Field ma o ia foi na fofogaina le faamanuiaga mai le tupu tamaitai o Peretania (Queen of Britain) Elisapeta II. Na fofogaina faamanuiaga mai i le afioga ia Su‘a William Sio ma le pulenuu o Aukilani Len Brown e le afioga ia Laauli Michael Iosefa (grandson from USA), aemaise foi o faamanuiaga mai i le Palemia o Aotearoa nei (Prime Minister of New Zealand) John Key ma le Ministry of Internal Affairs na fofogaina e le susuga ia Petelo Loli (grandson from Germany & United States Army Captain) na molimoli mai ai o latou alofaaga ma faamanuiaga mo le ausia ma le faamanatuina o le 100 tausaga o le tina ia Soonalote Asi Tanuvasa.
O se matatia foi e faigata ona ausia e nai o tatou tagata lenei laasaga o le aulia manuia o le 100 tausaga ma e lē uma ai le loto fiafia ma le agaga faafetai tele o fanau ma aiga i lenei faamanuiaga tāua i totonu o si o latou aiga.
Ua 5 augatupulaga a le tina matua ma o loo tuputupu pea lava faamanuiaga ma faaopoopoina ai pea le fuainumera o tagata soifua mai i le tina i totonu o si ona aiga.
Ia o faamanuiaga ma saafiafiga alofa mo oe tina matua Soonalote Asi Tanuvasa. Ia alofagia pea oe e le Atua ia na saga faafualoaina pea lou soifua tatou te saga mafuta ai pea i le lenei soifuaga e ui ina e lē tumau ma fai mo i tatou.
Manuia tele lou aso soifua tina! Alofaaga mai lau fanau uma lava, o fanau a au fanau, o fanau o fanau a au fanau, o fanau o fanau o fanau a au fanau, o fanau o fanau o fanau o fanau o au fanau aemaise ou aiga uma lava i soo se vaega o le kelope.
