Amata le Teuila ma ona faaaliga

Ua amata le vaiaso o le faaaliga o tu ma aganuu o le Teuila ma suiga eseese ua vaaia i lenei tausaga.  Ua aveese le tuuga-fautasi, ua leai ni tauvaga e pei ona sa iai o ausiva Samoa. Ua faagasolo o se vaega o faafiafiaga i le po ae ua leai ni tauvaga sa maua ai le faasologa o faailoga e pei ona sa sau ai lenei vaiaso. Ua faaopoopo le umi o le tauvaga tausala ma ua ave le faataua i a’oga latou te faatautaia le tele o faafiafiaga. E tasi lava le tauvaga o loo faatautaia nei i le itu o faaaliga nei o tu ma aganuu o le tauvaga lea a a’oga maualuluga i le sailiga o le a’oga e silisili ona lelei i tala ma siva faa le aganuu ma le a’oga aupito lelei i le tuufaatasia o siva Samoa ma siva faaonapo nei (contemporary). O se suiga ua vaaia i lenei vaitaimi ma le tomai i pese, siva ma isi vaega o faafiafiaga i le atunuu ma e foliga mai o suiga ua fiafia iai le tupulaga talavou. O le vaiaso la lenei o le a matauina pe o le a se maimoa iai a tagata asiasi mai.
O le Teuila e faamanatuina i le vaitaimi lenei i tausaga taitasi, i le atina’e o tagata tafafao mai e matauina ai le pa’u o le fuainumera o tagata e asiasi mai i Samoa. O le faamoemoe la ina ia avea le una’i o tu ma aganuu faa Samoa e ala i galuega taulima, taaloga faapea ai foi ma faafiafiaga ma auala e mafai ai ona siisii le numera o tagata tafafao mai i Samoa i lenei vaitaimi faigata o le tausaga mo tagata tafafao.
E to’atele i latou ua vaaia i Samoa i lenei vaiaso aemaise lava o tagata tafafao mai i Ausetalia, sosoo ai Amerika Samoa faapea ai ma Niu Sila ona mulimuli mai lea ma i latou i le atu Asia ma Amerika.
E to’atele foi ua laga le manatu o le a le savali le vaiaso o le Teuila i le faavae sa sau ai, talu ai le aveese o nisi nei o vaega taua o tu ma aganuu a le atunuu peita’i e foliga mai o loo ua aga’i le Pulega o tagata Tafafao mai ina ia una’i ituaiga vaaiga e fiafia iai tagata tafafao mai i fafo.
O le tausinioga o taaloga na amata ananafi le taamilosaga o le lakapi ta’ito’afitu o le Teuila, o loo ua faagasolo tausinioga o le kirikiti faa papalagi lea ua vaaia le tele atu o nuu ma au ua faaulu iai nai i lo le kirikiti Samoa.
Ua una’i foi le agai o le to’atele i lea taaloga ona o le manatu i le aga’i ai i fafo mo tausinioga faa va o malo. E le gata i lea o lea  ua faagasolo i le vaiaso lenei le tuuga vaa alo ua faapea ona faatautaia i le vaiaso atoa.
O faata’ita’iga o taaloga o le a faia lea i ga’uta o le Maota o le Malo i le Eleele Fou ma le faammoemoe ina ia aga’i iai tagata tafafao mai i fafo e a’oa’o iai nisi o taaloga ua lauiloa i le atunuu. O le finauga a le Itu Agai, ua matua liliu atoa lava lenei vaiaso ma ua le ave le faataua a le Malo I tu ma aganuu faa Samoa, o le mau a le Tautua Samoa e tatau ona tuu le teuila pe afai ua le lava tupe e faatino ai. Ae e ui i ia suiga o loo vaaia le tumutumu pea o le atunuu ma tagata mai i fafo e maimoaina nisi o polokalame o le teuila o loo faagasolo i le ao ma o le afiafi lea ua patino i faafiafiaga eseese o le a faatautaia ai i lenei vaiaso atoa i luma o le Maota o le Malo i le Eleele Fou.
O le tele o fonotaga ma faigamalaga mai i Samoa mo le fono a le Toomaga mo e Puapuagatia atoa ai le faamanatuina o le 125 o tausaga o le Felela Malisi o le isi lea mafuaaga o le tumutumu o le taulaga o Apia i lenei vaiaso ae o le a faamauina pe ua siitia le numera o tagata tafafao mai e ala i faatosina a le Pulega o tagata tafafao maimoa mai i fafo i lenei Teuila fuafua i Teuila ua mavae.
O le tausinioga o le sailiga o le Tausala o Samoa e taualuga ai lenei faamoemoe i le Aso Toonai o le vaiaso nei.