Ua faatonuina nei ma le agaga faamalosi e le alii o Hasim Rahman sa la fusuaga ma le alo o le atunuu ia Toaletai David Tua i soo se taimi lava, ma ua ia tautino foi e palaai Tuaminator pe a lē talia lana lu‘i.
O Rahman ua faatolu ona ia umia le Fusi o le Siamupini ma ua faalua ona feiloai ma Toaletai muamua.
I se pepa o faamatalaga mai New York ua saunoa manino ai lea alii iloga i le faipelega, e na o Tua lana paga o loo iai e fetaui lelei ma ia i le taimi nei ma ua sauni foi i se la feiloaiga faatolu i soo se nofoaga lava ma soo se taimi lata mai, ma o loo manatua pea foi e Rahman le la fetauiga mulimuli i le 2003 lea na tutusa ai i ‘ai i le Fusi o le IBF.
O Rahman ua 37 le matua o lona soifua na ia umia foi fusi o le IBF ma le WBC i le 2001.
Na faiaina ai foi le alii Siamupini o Lenox Lewis i le 2005, faatasi ai ma ana manumalo e 47, 7 faiaina ae 2 tutusa talu ona fusu faapolofesa.
O loo ta‘ua foi le lē fiafia pea o le alii ia Toaletai ona o lona lē taliaina o lana lu‘i e toe fetaui ai i le tausaga e 2004, ma ua ia matuā faatali lelei lava i se isi a la fusuaga lata mai e na te ta‘u ai le sese o Tua e pei ona ia faailoa.
O le uluai fusuaga a le toalua lea o le 1998 lea na manumalo ai Tua ae na ia ta‘ua o le la fusuaga lena na te faaigoaina o le fusuaga lē uma pe faaselemutu, ua faapea foi ona lagolago malosi e lana Faiaoga ia Greg Cohen le toe faia o se paga a Tua ma Rahman, ma toe pau lea o se fusuaga a lana tama ona toe oo lea i le Fusi o le Lalolagi.
Ae i le Pulega a Toaletai, e lē o mamafa tele ia i latou le tau luilui a le alii o Rahman. Fai mai Cursner o se faalavelave lea mea ua faia e Rahman a o sauni atu Toaletai mo lana fusuaga i le aso 21 o le masina nei ma le alii o Monte Barret i Amerika. Ia o upu masani a le atunuu, o le tau luilui e pa ai le mata, ae tatou tapuaia le alofaia o sosoo ai o le Tuaminator.
