“Fia maua ni tagata Samoa lelei i le taaloga faapei o Tiger Woods”…Tuilaepa
O le vaiaso lenei o loo tumutumu ai i Samoa le toatele o tagata tapolo faapolofesa i lea taaloga mai atunuu e pei o Ausetalia, Papua Niu Kini ma Niu Sila, faapea Fiti ona o le tauvaga faavaomalo i lea taaloga o loo lagolagoina e le SIFA, o se tasi o faalapotopotoga tau tupe faavaomalo a le Malo o Samoa.
E $75,000 tupe Ausetalia ua ofoina e le SIFA (Samoa International Finance Authority) mo lea faamoemoe.
O lona uiga e silia i le miliona tala Samoa ua ave e le Malo e saga siitia ai le atiina a‘e o lea taaloga lauiloa i le lalolagi.
O le atinae o lea taaloga i Samoa ua maualuga ona ua toatele alii ma tamaitai, e lē gata i le au matutua ae o le tupulaga talavou ua fiafia tele i ai.
Peitai e lē o iloga lava ona tulai mai ni tagata Samoa ua oo i se tulaga maualuga a latou ta, poo le tulaga o le polofesa e pei ona ta‘ua o le master lea e tausinio ai le au atamamai i le taaloga.
O se fautuaga lea ua momoli e le taitai o le Malo i le alii Palemia i le au tapolo a Samoa o loo tausinio i tauvaga faavaomalo e pei o le tauvaga o loo faia i le vaiaso nei, ina ia faaaogā tatau le avanoa.
Na faaleo se faanoanoaga o le Palemia ona o lana mātau ua faaaogā e le au tatā a Samoa lea avanoa e onanā ma inu ai le ava malosi ma lolofi i taumafa, ae e lē o iai se agaga e faaaogā le avanoa e milo ai ma le au tapolo polofesa ma a‘oa‘o mai ai nisi mea tāua ma metotia o le taaloga.
“Ua tatou faalogo i le alii Fiti foi lea e tautaua nei i le tapolo ae leai lava se isi o tatou ua sōsō i ai”, o le saunoaga lea a Tuilaepa a o punonou nisi o le au tapolo a Samoa e aunoa ma se leo e faalogoina.
“E fia maua nisi tagata lelei i Samoa i le taaloga faapei o le alii foi lea o Tiger Woods o loo numera tasi i le lalolagi i le lelei o le ta, ae lē o le lelei i isi mea ia e ta‘ua ai lona igoa i tamaitai”.
Na lagona le magamaganū o le aofia ma nisi o loo taliē auā ua latou silafia ma iloa le mea o loo faatatau i ai le saunoga a le Palemia.
O le luitau lea ua ave nei i le au tapolo a Samoa, ia maualuga se tulaga e oo i ai le latou taumafai.
O nisi o le au polofesa o le taaloga o loo auai i le taamilosaga e aofia ai le alii Fiti o Krishna Singh, o Nathan King mai Kuiniselani i Ausetalia ma le alii talavou o Taylor Cooper.
O le malae tapolo o le Penina Golf Course i Mulifanua lea e sosoo ma le faletalimalo tu matafaga o Aggie Greys o le a faia ai le taamilosaga. Fai mai le Palemia o se malae e faapei o malae tapolo tetele i fafo, e faigata tele ona fuafua ai le ta.
