Se vaaiga masani i laina uumi i fale palota i taimi e faatino ai faigapalota i Samoa e sailia ai tofi faipule o le Palemene
Ua toe lalaga e le Tautua Samoa party le mataupu i le faatino mai fafo o palota a tagatānuu o Samoa o aumau ma nonofo ai, nai lo le faiga tuai o le tau malaga mai i le atunuu e lesitala ma faia ai a latou palota pe a oo i aso e faatino ai faiga filifiliga mo le sailia o tofi faipule o itumalo i le Palemene.
O se mataupu sa lalaga foi e nisi o vaega faaupufai i faigapalota ua mavae pei ona sa finauina foi e le SDUP ma le SNDP o nisi o vaega faaupufai sa agaia faigamalo ua mavae a le HRPP.
Faaalia e le Palemia, susuga Tuilaepa L Sailele Malielegaoi i sona finagalo e tali atu ai i le toe lalaga e le Peresitene o le Tautua Samoa Papalii Panoa Tavita Moala ma se sui sa avea ma faipule le tofa Lealailepule R Aiafi o le mataupu, o loo sili atu ona lelei le faiga o iai nei.
“E lei suia lava talu mai le taimi o Mataafa le Palemia muamua, sosoo ai ma le Ao o le Malo o iai nei a o avea ma palemia, auā o a‘u faato‘ā ou palemia ananafi”, o le finagalo o Tuilaepa.
“O le mea lea ua masani ai le toalua lena (Papalii Panoa ma Lealailepule) o le o loa i fafo e fai a latou suega tupe mo campaign, ona o lea faavevesi fua mafaufau o tamalii o le atunuu o alala i fafo”.
O le finagalo o Tuilaepa e sili atu ona toatele tagata Samoa ua nonofo nei ma aumau i Niu Sila, Ausetalia ma Amerika, ma a tuufaatasi poo ua silia i le tolu selau afe.
“O se tu maualalo tele le nonofo o tagata i Samoa ae fai mai e fafo le faaiuga o tofi faipule o itumalo”. Na faaalia foi e le Palemia o loo lelei foi le faiga o le sau o se tamalii poo se failauga o alala i fafo nofo i Samoa mo le tolu tausaga ona faato‘ā agavaa lea e avea ma sui tauva o se faigapalota.
“O aso ia e o mai nonofo i Apia ae lē o i tua se‘i mafuta ma nuu ma itumalo e iloa ai pe se sui agavaa auā o nisi sui sa malaga i fafo o laiti ae foi mai ua matutua”.
O le masina o Setema i lona faaiuga o loo fuafua ai le Tautua Samoa e faia se latou feiloaiga ma le mamalu o Samoa i Niu Sila ma o le a soalaupule ma talanoaina ai nisi o mataupu o loo fuafua lea vaega faaupufai e lima taitaiina ai a latou tapenaga mo le faigapalota a le atunuu i le tausaga fou.
O le latou malaga foi lea o le a faia ai se latou suegatupe i le faamoemoe e fesoasoani ai ia latou tapenaga o le palota o le 2011.
Ua faailoa e lea pati ua silia i le 31 sui tauva ua faamaonia o le a taufetuli mo le Tautua Samoa, ae e lē o nofoai ai i le sailia pea o nisi sui ona o loo iai le latou fuafuaga e tofu uma itumalo faafaipule o le atunuu ma sui faatutu.
