O mātua o le tamaitai o Jane Apoiliu Stephen, o lona tamā o se alii palagi ua mae‘a foi ona faaee i ai faaloaloga a le afioaga i Salelavalu i le suafa Tagaloa John Brough, ma lona tina ia Tausili Brough i le afioaga lava o Salelavalu mai le motu i Salafai.
O le tamaitai o Jane Apoiliu Stephen, ua mae‘a ona faauuina i se tasi o faailoga tāua tele le (Bachelor Health Science, BHSc) Major: Public Health. Na mae‘a le taumafai ma faauuina ai Jane i le Iunivesite o Aukilani i le tausaga e 2009, ma ua faaaogāina ai ma aloaia i le tausaga nei 2010.
O se faailoga e seāseā ona afea i le tausinioga a tagata Pasefika. Sa fesiligia le tamaitai o Jane, pe aisea na ia filifilia ai ma manatu e tauave lea foi faailoga, aemaise ai o se lumanai mo ia e ala i se galuega e faapitoa i ai.
Na ia ta‘ua e faapea ona pau lava o le manatu ma le manaoga na tuuina atu e le Atua i lona loto, e faaaogā i ai lona tomai aemaise o le foai a le Atua i lona olaga. Sa ia manatu foi e telē se aogā ma se galuega e mafai ona auauna ai i tagata o lona atunuu faapea soo se isi lava pe afai ae manuia lona taumafai.
O le taimi nei ua mafai ona faaaogāina le tomai o le tamaitai i totonu lava o le Iunivesite o Aukilani i le vaeaga tonu o loo latou faia ma faataunuuina le faatinoina o suesuega i mataupu uma tau i le soifua maloloina.
O se tasi foi lea o tulaga manuia ma le tāua tele, ona o le faapogai tonu lea o loo faamatuu mai ai faamaumauga ma faaiuga tusitusia i faaiuga o soo se mataupu e suesueina mo ni faamaoniga e manaomia.
O le vaega tonu o loo tautua ai lenei alo o le atunuu, o le suesueina o i latou e taumafa tapaa pe ulaula.
O le tele o taimi e faafofogaina ai i lipoti ma talafou faaiuga o ia suesuega. E tele foi taimi e fesiligia ai e le mamalu o le atunuu, poo ai tonu ae pe faamaonia foi nisi o fuainumera faamaumauina i le mataupu lava i le tapaa.
O le isi foi lea vaega sa fesiligia ai le tamaitai o Jane, ae sa ia faaalia e moni lava ma faamaonia tala o loo faalauiloaina, ona e faavae uma ia lipoti i faaiuga o a latou galuega.
Na faamaonia mai foi e Jane, e faato‘ā mafai foi ona faalauiloa faalauaitele ni faaiuga o a latou sailiiliga e fai, pe afai ua mae‘a ona faamaonia tulaga uma e ala i galuega sa faatinoina.
O se tasi o faaiuga sa faailoa mai i le talanoaga lenei, o pasene ua toe oso ai nei i luga le aofai o tagata Samoa e tagofia le tapaa.
O se faamaumauga lata mai lea o loo taulimaina nei e Jane ma le latou vaega, ua mautinoa ai e ui lava ina pito i lalo tagata Samoa e taumafa tapaa mai atunuu uma o le Pasefika o loo aumau i totonu o Niu Sila, peitai ua faapopoleina ina ua toe faaopoopo isi pasene talu mai faamaumauga sa iai.
O le autū tonu o suesuega e faapitoa lava i le sailia o auala e uunaia ai tagata Pasefika ina ia taofi le ulaula, ae silisili ai ona lagolagoina ni faiga e fesoasoani ia i latou lava ia pe afai ae faataunuu le taofia o le tapaa.
E aofia ai foi le toe fesiligia o i latou sa ulaula i aso ua mavae, ae ua mafai ona taofia, e tāua tele auā o nisi ia o auala e fesoasoani ai mo i latou ua faigata ona taofi le ulaula i le taimi nei.
E saili foi ma fesiligia le toatele i le tulaga o soo se fautuaga i le faaaogāina o auala eseese mo le faamoemoe lava e tasi o le taofia o le tagofia o le tapaa.
O nisi nei o faamaumauga o loo taulimaina i le taimi nei o pasene o le autaumafa tapaa mai atunuu uma o le Pasefika i Niu Sila.
Cook Island – 38%
Niue 33%
Tonga 29%
Samoa 28%
O Samoa o loo maualalo le fuainumera, ae ui i lea e pei ona ta‘ua ua toe oso i luga pasene o tagata Samoa mai le tulaga sa iai muamua.
E avea foi lenei avanoa e momoli atu ai le faamalosi mai ia Jane mo tupulaga uma o Samoa, ona o lona naunautaiga ina ia taumafai atili ma le malosi i a‘oa‘oga o loo feagai ai, auā e lē faigofie, ae iu lava i le fiafia pe a taunuu moemitiga ma faamoemoega.
O loo moomoo foi lea alo o le atunuu, talosia ia toatele nisi alo o Samoa e afea lea foi matata ua faamanuia ai lona tagata, ia latou faatatauga ma fuafuaga.
O alofaaga faapitoa o le tamaitai o Jane e momoli i lona ta‘ita‘i i le galuega, Dr Vili Enosa, Dr Marewa Glover, faapea Honours Director Dr David Newcombe, ona o le lagolagoina o lona taumafai.
E lē gata i lea, a o se avanoa foi e faafetaia ai ona aiga uma i Samoa ma Niu Sila, o nai ona mātua ia John ma Tausili Brough, aunties ma uncles Philip ma Maureen Harrington, Laufou ma Asovalu Manase, Mafua Kolose Lupe Tagaloa.
O alofaaga foi mo le ekalesia pele a le Salvation Army i Glenfeild ona o talosaga aemaise ai foi o ana paaga uma o loo galulue faatasi i le galuega faigata. Malo aupito, kaaue lahi, kia manuia. Best of luck in your endeavours to be smoke free. Ia manatua o le taofia o le tapaa o se filifiliga tāua tele ma le poto, e lē gata mo oe, ae faapea foi lou aiga.
O laina fesoasoani o le 0800 778 778 pe afai ua e manatu e fia taofia lea tulaga o le ulaula. Ua avanoa foi le laina mo tagata Samoa lava latou, o le a mafai ai ona e talanoa i lau lava gagana.
O le tautua a le Pacific Unit telefoni 0800 TO QUIT poo le 0800 867 848.