Na fetaui le siamupini o le Supa XV le Waratahs ma le au malosi a le Chiefs i le Aso Faraile na se‘i mavae atu nei i taaloga sauniuni a o lei amatalia le tauvaga, ma na faia lea taaloga i le malae i Campbelltown. O le alii iloga ia Israel Folau ma le alo o Samoa ia Sonny Bill Williams na mataituina a o lei faia le taaloga.
E pei ona silafia o i laua uma nei sa iloga i le taaloga lakapi a o taalo Folau mo le Broncos ma le Kangaroos a o Sonny Bill mo le Bulldogs, Roosters ma le Kiwi. O le uigi iloga a le Manu Samoa ia Alofa Alofa mai Sini lea sa taalo mo le Waratahs ua siitia nei i Farani mo le kalapu a Rochelle lea ua sui ai nei le alii Fiti o Taqele Naiyarovoro.
Na manumalo le Waratahs 38-36 mai sikoa e tolu a Rob Horne Taqele, Folau ma Jacques Potgieter, a o ‘ai a le Chiefs na maua mai i sikoa a Hosea Gear, Bryce Heeme, Kolomatagi, Fitzgerald ma sala na kiki e Mackenzie ma manumalo ai loa le Waratahs 38-36. O le tausaga nei i le masina o Oketopa e amatalia ai le ipu o le lalolagi e faia i Egelani lea e auai atu ai le Manu Samoa e saili so latou avanoa i le tauvaga o le Ipu autu talu mai le 1991 ma le 1995.
Mo Ausetalia ma Niu Sila o le a vaaia ai foi nisi o alo o Samoa ma le Pasefika auā ua amata na soo uma au malolosi o le lalolagi na amia ai fanau talenia a Samoa.
