Vevela taamilosaga lakapi a le Aukilani Samoa

Ua faasolo ina faamaeaina le taamilosaga o taaloga lakapi o loo faafoeina e le Aukilani Samoa mo lenei foi tausaga 2009.
E pei ona silafia o lenei taamilosaga o loo tele foi sona sao mo le fafagaina o le au lakapi faavaomalo a le atunuu le Manu Samoa. E le gata i lea foi faamoemoe ae o le maua o avanoa e atinaeina ai le olaga taalo o tama taitoatasi lava ia mo le agai i luma o le taleni ma agavaa ua tuuina i ai e le Atua.
Sa taua e le susuga i le alii failautusi o le iuni lakapi a Aukilani Samoa, Tasi Auapaau, e tele foi se suiga o le tulai mai o agavaa o tama taaalo i lenei foi tausaga pe a fua i tausaga ua mavae.
E foliga mai o loo alualu pea i luma le tomai e faaalia i taimi o taaloga i Aso Toonai taitasi, ma o se tulaga lelei tele lea, aua e faatupu lagona foi i le peresitene ma le komiti o loo faafoeina taaloga, ina ia saga saili pea ma faaleleia auala uma mo le agai i luma o le iuni lakapi.
O le Aso Toonai o le vaiaso i ona tua atu sa faagasolo ai taaloga mo au e valu pito i luga.
O le taaloga i le va o le Apia Maroon, ma le Auckland Red sa faataunuuina i le malae numera lua, na manumalo ai le Apia Maroon i ‘ai e 29 i le 6 a Auckland Red. O lea faaiuga na maua ai loa le avanoa o le au a Apia Maroon e taaalo ai mo le Semi Finals i le Aso Toonai na tea nei.
O le taaloga i le va o Falelatai ma Sataoa, o se taaloga manaia foi i le tau fai malolosi o au e lua, peitai e pei lava o le upu masani a le atunuu, e le mua uma ni vaa se lua. O le iuga o lea taaloga, sa manumalo ai le au malosi a le afioaga o Falelatai, Tama o le Tauaana, i ‘ai e 26 ae 8 ai o Sataoa.
O isi taaloga o le Quarter Finals i le Aso Toonai lava lea, sa fetaui ai le au malosi a Saleimoa, ma o le au foi lea sa latou umia le talita, ma le au a le afioaga o Afega, le Laumua o Tumua. Sa finau tele foi lea taaloga, aua e leai lava se au e manao e faiaina, ae na o le manumalo lava e manao i ai. Peitai i le faaiuga o lea foi taaloga, sa faiaina ai Afega, ae toe tumau le talita ia Saleimoa ina ua manumalo i ‘ai e 22, ae 3 Afega.
O le taaloga i le va o Samatau ma le au a Nations, o le iuga o lea foi taaloga, manumalo le Nations i ‘ai e 23 i le 13 a le au a Samatau.
O le Aso Toonai loa la na tea nei na faagasolo ai Semi Finals, ma agai atu ai loa mo le faaiuina o taaloga mulimuli poo Finals i le faaiuga o le vaiaso nei.
O taaloga i le Semi Finals i le Aso Toonai na tea nei, na feiloai ai le Apia Maroon ma le Nations, ae fai ai le iloiloga a au malolosi o le taamilosaga, Saleimoa, ma Tama o le Tauaana.
O iuga uma o nei taaloga o loo faaali atu i le lisi o loo mulimuli mai, faatasi ai ma le faasologa o taaloga i suegafusi i le Aso Toonai nei.