Taunuu i Niu Sila le malaga YFC mai Samoa

E toa luasefulu ma le valu le aofai o le malaga a le Autalavou mo Keriso, poo le YFC e pei ona silafia ai, ua taunuu mai i Niu Sila nei. O le au o loo malaga mai o loo taitai mai lava e le susuga i le faatonu ia Fitu Mau ma le faletua ia Fogatia.
O le susuga ia Fitu o le faatonu lona fa lea o le YFC talu ona faavaeina i totonu o le atunuu.
O le tausaga e 1973 na faavaeina ai lenei mafutaga i lalo o le taitaiga a le susuga ia Tavale Mataia ma o ia foi o le uluai faatonu sa muai faavaeina (founder) lea auaunaga.
Ina ua valaauina le susuga ia Tavale mo le amataina o se tasi o galuega i fafo mai o Samoa, ona see ane lea o le galuega ia Viliamu Mafoe, a o lei amataina le galuega a le Worship Centre. O le lona tolu o alii faatonu, o le susuga ia Isaia Lameta, ma le lona fa o Fitu Mau o loo tauaveina le galuega e oo mai i le taimi nei.
O Tavale Mataia o loo avea nei ma faifeau o le ekalesia Upu o le Ola (Word of Life) i Niu Sila nei. O le susuga ia Viliamu Mafoe o loo faifeau i le ekalesia Worship Centre i Samoa, o le taitai foi o le ekalesia aoao.
O Isaia Lameta ua tofia e faifeau i le Ekalesia Peace Chapel i Henderson i Niu Sila nei, a o le susuga ia Fitu o loo faifeau lagolago ia Pastor Samoa Unoi o le Peace Chapel i Samoa.
O se tulaga e atagia ai le tele o le galuega a le autalavou mo Keriso, sa aiaina ai soifua o taitai sa tuufaasolo i ai le galuega, ae le gata i lea, o le toatele foi o i latou sa oo atu i ai le galuega talai a le YFC, mai lava i fatia ua alu ma le uluai taimi sa faavaeina ai i Samoa.
O nisi o le tino lava o le autalavou ua faapea foi ona tulai mai mo le galuega a le Atua i le galuega faafaifeau, e iai le susuga ia Pastor Peter Crichton, Muavae Mika, Tino Tioa, Lui Ponifasio, Peter Leota, Aukuso, Leauli Ieriko, Sepiliano, Tanu, Lolagi, Aperaamo, ma le toatele o isi ua le mafai ona maua uma o latou suafa o loo galulue i Samoa ma isi atunuu o le lalolagi.
O le galuega ua faamanuia i ai le Atua i le faaolaina o agaga o tagata Samoa, ma ua le nonofo mau ai foi i totonu o le tino o le YFC, a ua taape atu ma faasalalau atu ma ua faamanuia ai le tele o ekalesia Kerisiano i Niu Sila nei ma isi atunuu o le kelope.
‘O le faamoemoe o le malaga mai o le autalavou ona o se fuafuaga lava sa fuafua mamao mai, ae sa vaavaai lava foi ma tuuina atu i le Atua mo le faataunuuina’, o se saunoaga manino lea a le faatonu ina ua feiloai atu i ai le tataou nusipepa i le faaiuga o le vaiaso.
O le autu ma le aano moni o le asiasi mai, ona o le taumafai lava e faailoa le galuega faaevagelia i auala eseese o loo faaaogaina ai e le Atua, soifua o le au galulue, atoa ai ma le galuega talai, aemaise o le fia auai ma mafuta mai i le toatele o i latou sa faavaeina le galuega i Samoa, peitai ua galulue nei i Niu Sila, i auauna a le Atua, a o le tele o isi foi galuega lelei ua valaauina ai e le Matai.
O le aso 27, 28 ma le 29 o le masina nei e faataunuuina ai se tuufaatasiga o le faapotopotoga lea a tagata tuai o le YFC i Niu Sila nei.
O le Aso Tofi o le vaiaso na tea nei na taunuu ai le malaga i Aukilani ma o le afiafi foi lava lea sa faataunuu ai tulaga o le aganuu e pei ona masani ai.
O le ava o le feiloaiga ma tulaga masani lava foi o le feiloaiga sa faatinoina e le susuga ia Tino Tioa, o le susuga i le feagaiga o le ekalesia o le Upu o le Ola, (Word of Life) i Otahuhu, ma o i latou foi sa nofo faatali mo le taunuu mai o le malaga.
O le afiafi o le Aso Sa na tea nei sa mafuta atu ai le au malaga i le ekalesia Voice of Christ i Henderson, a o le afiafi sa faatasi atu ai ma fai sauniga i le ekalesia a le Livinstone Samoan Evangelism i Mahunga Drive i Magele.
O tapenaga a le malaga e aofia ai pese ma tala, siva faaleagaga, o aitema eseese sa fefaasoasoaai ai ma le auuso i le lotu taeao ma le lotu afiafi.
E lua ma le afa vaiaso le umi o le a iai le autalavou mo Keriso i Aukilani nei.
Ma e iai foi le faamoemoe o le a malaga atu ma asia foi isi itu o Niu Sila nei.