Aisea ua aiā ai le Malo ile pulea o tiute ole Matai Sa‘o? Pe ole lisiina atu o eleele faaleaganuu mo pisinisi le mafuaaga ua soalaupule ai pe tatau pe leai foi ona faia ni taiala e faatulafono ai tiute ole Matai Sa‘o?
O ā ni faamaumauga o iai ile faamasinoga o fanua ma suafa ini mea ua tutupu ua faaletonu ai le pule ale Matai Sa‘o? O nisi ia o fesiligia na folasia mai matai ole atunuu sa auai ile fonotaga faalauaitele na taloina ele ofisa ole komisi mo le toe lauliliuina o tulafono ona ole mataupu ile soonafai o tiute ma le pule ale Matai Sa‘o i totonu ose aiga Samoa.
Peitai e ui ina iai ia faafesili ae ole tali malamalama ale afioga ile Pule Sili ole Matagaluega o Faamasinoga ose tasi o sui ole komisi, le Susuga Papalii John Taimalelagi, ole tele o faaseā ua oo ile afioga ile Palemia ua fesiligia ai le amiotonu ole faatinoga o tiute ole Matai Sa‘o ose aiga, le mafuaaga ole fautuaga ale Palemia, Susuga Tuilaepa L Sailele Malielegaoi, ile ofisa ole komisi ina ia faia se sailiiliga i finagalo ole atunuu ile mataupu.
Ose tasi o mafuaaga ua fesiligia ai tiute ole Matai Sa‘o ona ole faaaogāina o tupe o lisi o fanua faaleaganuu. Faaalia e Papalii i lana folasaga o tupe uma ole lisi oloo alu ile Matai Sa‘o auā o ia oloo iai le pule i fanua ole aiga. Peitai e iai Matai Sa‘o ua ia lē faasoasoa lelei seleni i suli ma feoi e aiā ile eleele ae ua fai ai lava lona ivi.
Ole filifiliga ose Sa‘o ose aiga ole matafaioi lea a suli ma feoi, ae o nisi faafitauli ua aliali i luma ole faamasinoga o fanua ma suafa ua mananao le aiga na filifilia le Sa‘o e toe aveese le suafa Sa‘o ona oloo alala i atunuu i fafo. Peitai na faaalia e Papalii o suli na tofia ma sa latou silafia lelei ole tagata ua tusi aao iai oloo aumau i fafo, ma ole fesili pe aisea ua toe faitio ai ae o latou lava na faia le filifiliga.
Ose tasi o itu sa folasia ile fonotaga faalauaitele pe ua tatau ona aveese le upu Sa‘o ma le pule ae tuu iai ni faaupuga ile tulafono e faailoa ai o lē ua seei ise suafa e tausia se aiga ose taitai ma ole tausimea ale aiga potopoto.
Ole tasi foi tulaga sa folasia ua iai aiga ua tele tagata ua seei i suafa Matai Sa‘o ma ole isi lea pogai ole tutupu o feteenaiga ona ua faalala le pule faa-Sa‘o. Pe lē tatau ona faatulafono loa ua lava le tasi pe lua oni suli e umia le suafa Sa‘o ose aiga.
Ua mae‘a nei la ona faia fonotaga faalauaitele ale komisi ma le atunuu ma ua agai nei e silasila i lagona ma finagalo na faaalia ona maua ai lea ose lipoti e tuuina atu ile Kapeneta.
