Na faailoa ele afioga ile faamasino o Vui Clarence Nelson suafa o nisi o leoleo e aofia ai i latou sa umia tulaga faaleoleo sinia na faasala ele faamasinoga ile falepuipui ina ua faamaonia ni o latou moliaga faasolitulafono i luma ole faamasinoga. Na mafua ona faailoa ele faamasino suafa o ia leoleo ona ole folasaga ale itu a leoleo sa tuuina atu mo le faia iai ose iloiloga ise faasalaga mo le afioga Tagaolo Iosefatu Wright, e lei tuuina atu ia vaega tāua.
Na faailoa e Vui ile afioga Tagaolo e tele itu lelei sa tuuina atu e lana loia e lagolago ai se faasalaga e lē ole falepuipui, peitai ole silasila ale faamasinoga i ona moliaga e lē gata e matuiā ae o ia sa iai le faatuatuaga o isi leoleo sa i lalo o lana vaavaaiga ma e lē tatau ai ona ‘alo le faamasinoga ile tuuina atu ose faasalaga falepuipui ia te ia.
Ole afioga Tagaolo ose tasi o leoleo sinia ua leva tausaga o tautua ile Matagaluega o leoleo ma falepuipui a‘o tuufaatasi ia vaega e lua. E oo mai ile taimi na vavae ese ai le falepuipui ma leoleo oloo faapea lava ona auauna ma galue, lea sa umia le tulaga faaleoleo ole Suprintendent.
E ono moliaga sa uluai molia ai o ia, ae ina ua suesueina ele faamasinoga tuua‘iga e na‘o le 4 moliaga ole gaoi a‘o avea ma tagata faigaluega (theft as servant), na faamaonia.
O Ianuari e oo ile masina o Tesema ole tausaga e 2014 na faatino ai le solitulafono faapea Tesema 2014 e oo ile masina o Ianuari ole tausaga ua mavae 2015.
I folasaga a leoleo na faaalia ai na faaaogā e Tagaolo lona tulaga o ia ole taitai leoleo sinia oloo iai le vaaia ole ofisa o galuega mo le vaaleoleo ole Nafanua e faatonu ai nisi o leoleo i lalo o lana vaaiga e utu mai penisini i kalome 44 sa tuu ai penisini mo le vaaleoleo ole Nafanua ma isi vaa laiti e faaaogā i galuega.
Ose tasi o alii leoleo sa faatonuina e Tagaolo sa ia pue se ata i lana telefoni ole taimi na ia aveesea ai penisini. Sa fesiligia o ia ele faamasinoga pe aisea na ia pue ai le ata ae o lana tali, e teu mo lona puipuiga ina ne‘i oo ise taimi e saili ai ae oloo iai le molimau mo ia.
I faamaumauga ale faamasinoga o fesili nei na tuuina atu ile alii leoleo na molimau i lona pueina o ata o penisini ma laupapa plywood ma meshwire sa aveesea mai le lotoā ole ofisa ole Nafanua i luga ole uafu i Matautu tai i Apia.
“Fesili: Faafefea na e pueina au ata?
Tali: Na ou pueina faaaogā ai la‘u telefoni.
Fesili: Fea la na ave ai au ata ia?
Tali: Sa ou teuina lava, leaga na ou iloa e iai le taimi e sue ai nei mea.
Fesili: E iai se mafuaaga na lē lipotia ai ile Ofisa o Leoleo le gaioiga na sa e vaai ai ile aso lea?
Tali: Na ou pueina e fai ma self-defence ia kaika e pei o aso faapenei
Fesili: Le ā le uiga o lau tala?
Tali: E puipui mai ai foi ta ita mai le faatonuga lea sa fai
Fesili: O ai sa faia le faatonuga lea ete ta‘ua?
Tali: Ole susuga ia Tagaolo.”
Ole tele o molimau ale itu a leoleo o Malu ole Malo sa galulue ile vaaleoleo ole Nafanua i lalo ole taitaiga a lē ua molia.
O molimau uma nei e toetoe lava tutusa a latou molimau tuu fofoga i gaioiga na faia ma le faatonuina o latou e utu penisini.
Ose tasi o leoleo na molimau na ia ta‘ua ua leva tele ona faia lenei gaioiga e lo latou taitai. Na te manatua ole tausaga e 2010 e faaono ona faatonuina o ia e Tagaolo e faaaogā le faagaau e utu mai ai peinisini ile kalone 44 ma ave tuu i tua o lana taavale.
Na amata le fua ale faamasinoga ise faasalaga mo lē ua molia ile 3 tausaga ae o nisi o itu lelei e pei ole toe faafoi o laupapa plywood ma totogi le tasi le afe tala e faapea ole tau lea o penisini na gaoia ua aveesea ai le lua tausaga ole faasalaga ae tuli na‘o le 12 masina ile falepuipui.
