Ua iai le fuafuaga a le Kamupani Vaalele o le Polenisia ina ia vāea nisi o ana tagata faigaluega ina ua lē toe maua e le Polenisia le konekalate e faatino ai galuega i le Malaevaalele i Faleolo mo le Polynesian Blue.
E oo mai i le taimi nei e lē o faamautu se numera o tagata faigaluega o le a vāea mai i lea itu o le atunuu.
Faaalia e le Ofisa Sili o le kamupani vaalele, o Tauā Fatu Tielu, ona pau le tulaga ua faamautu i le taimi nei e iai tagata o le a leai ni galuega i le tausaga fou.
O le kamupani e ta‘ua o le Oceania Aviation Services lea ua manumalo i tauofoga e faatino ai galuega i le Malaevaalele mo le Polynesian Blue, ma o le aso 29 o Ianuari lea ua fuafua e amata ai le kamupani fou lea i le Malaevaalele Faavaomalo i Faleolo.
E tusa ma le 40 pasene o galuega faatino i le malaevaalele lea ua faamautu o le a lē toe maua e le Polenisia. Talu ai lea tulaga ua manatu Tauā e tatau lava ona tuu i lalo le tupe alu a le Kamupani ia ogatusa ma tupe maua, ma ona pau lea o le auala e faatino ai le faaitiitia o tupe alu, o le faaitiitia o le numera o tagata faigaluega talu ai e tele lava le tupe o loo alu i totogi o tagata faigaluega.
E latalata i le tasi le miliona tala le tupe na faaalu e le Kamupani Vaalele mo masini ma mea faigaluega e faaaogā i le malaevaalele, ma e lei umi atu le taimi na faatau ai ia masini ae o lea ua lē toe faaaogāina i galuega ia ua lē toe maua e le Polenisia.
Ua ta‘ua e Tauā Fatu o loo filifili i le taimi nei pe toe faatau ese ia masini pe ua tatau ona taofiofi mamau i ai le kamupani nei toe moomia i le taimi nei.
Ua faasalalau foi e le kamupani o le Oceania Aviation avanoa faigaluega mo tagata i Samoa auā le faatautaiga o a latou galuega i le Malaevaalele i Faleolo, ma o loo talotalo Tauā e maua ai avanoa faigaluega a ana tagata faigaluega a le Polenisia ia o le a vāea mai i auaunaga a le Avefu‘a a Samoa.
O tagata nei na ta‘ua e Tauā Fatu ua tele tausaga o galulue mo le Polenisia i galuega eseese e moomia i le malaevaalele.
O le aveese e le PolyBlue o le galuega mai le Polenisia, ona o tulaga tau i le saogalemu e lē o manatu le PolyBlue o atoatoa ai le auaunaga a le Polenisia.
O le mafuaaga lea o le tauofoga na fai ina ia saili ai nisi kamupani e mafai ona faatautaia a latou galuega i Faleolo mo i latou.
Sa toe talosaga foi le Polenisia i le tauofoga ae manumalo ai loa le Oceania Aviation.
O galuega i le malaevaalele e aofia ai le siaki o pasese e femalagaai, o le la‘uina ma le aumai o uta a tagata malaga, o le faamamā o vaalele a o lei toe tuua le malaevaalele, o le siaki a inisinia e faia i vaalele a o iai i le malaevaalele, ma le faaaogā o taavale e la‘u ai uta a vaalele.
O loo talotalo foi Tauā Fatu, ia faaaogā e le Oceania Aviation a latou masini ia ua lē o toe faaaogāina pe a amata ia Ianuari.
O galuega faainisinia mo le Polynesian Blue o lea ua manumalo ai le kamupani mai Tonga e igoa o le Palu ma na ta‘ua e Tauā Fatu Tielu, o lea ua talanoa atu lea kamupani e saili mai foi lava i Samoa tagata e faatinoa a latou galuega i Samoa ona o lea ua leva le Polenisia i ana galuega i Samoa.
O loo faaauau ona faatino e le Polenisia galuega o le Malaevaalele mo le Kamupani Vaalele o le Ea Niu Sila ma le Kamupani o le Ea Pasefika.
O le eseesega o Kamupani nei e lua ma le Polynesian Blue na faaalia e Tauā Fatu, ona o le Ea Niu Sila ma le Ea Pasefika e iai lava o latou sui e galulue faatasi ma sui o le Polenisia i le faatautaiga o galuega nei i le malaevaalele ma o i latou ia o loo taitaia galuega a le Polenisia pe a taunuu vaalele pe sauni malaga ese foi.
E umi atu kamupani nei e lua ae ua tumau le faatuatuaga i le Polenisia ma na faaalia e Tauā, e moni e iai lava taimi e faaletonu ai le tautua ma e faapea lava i kamupani uma i le lalolagi e faatautaia galuega i soo se malaevaalele. “Ae o ā lava faafitauli e tulai mai e lē o taofia ai le matou galuega o le toe faaleleia o le auaunaga, ona pau lava e tulai mai lava faafitauli i lea taimi ma lea taimi, ae o le natura faatagata soifua o le iai o sasi, o le galuega a tatou nei e taitaia ia galuega ina ia faalelei faaletonu,” o se saunoaga lea a le alii Ofisa Sili o le Polenisia.
Na ia faaalia foi sa fautuaina lava le Polynesian Blue e avatu sana tagata faigaluega e taitaia galuega e faatino i le taimi e taunuu mai ai a latou vaalele e pei lava ona iai sui o le Ea Pasefika ma le Ea Niu Sila, ae mumusu foi ma faapea mai e tatau ona tutuli le aufaigaluega a le Polenisia pe a taumafai e saini nisi auala e a‘oa‘o ai ia tagata ma na faaalia e Tauā Fatu, o loo taumafai lava i le lelei e gata mai ai le latou auaunaga. Ae e foliga mai o lelei ua gata mai ai le taumafai a le Polenisia e lē o tutusa ma le lelei o loo moomia e le Polynesian Blue.
