O le lagalagā pea o fesili ua faalauiloa i nusipepa, leitio faapea ai televise i le ono molia ai o se tamaititi na maua o feaveaia mariuana mo ona mātua, ua ta‘ua ai e Leoleo e mafai ona molia tamaiti i solitulafono aemaise o lē ua aafia e i luga atu o le 8 tausaga le matua.
O le faaalia a le Sui Sooupu o le Matagaluega o Leooleo ma Falepuipui, le Afioga Leaupepe Fatu Pula, e faigata lava ona molia tamaiti ae mafai ona aafia le tamaititi lea ua ta‘ua, talu ai e 10 tausaga le matua. O le faaaliga a le alii Komesina Lagolago o Leoleo, o le lipoti mulimuli a le au suesue i lenei mataupu, o mātua o le tamaititi lenei ua vaavaai e molia i lenei mataupu, ma e manino lava na faaaogā e le ulugalii lea le la tama ona o le manao ina ia aua ne‘i mateia e se isi a la gaioiga faasolitulafono o loo fai nei.
O le tamaititi lenei na maua se avanoa e alu ai i se taavale a se faafeagaiga na agai i Saanapu.
Na fesiligia e le faifeau le tamaititi i lana ato aoga o loo malaga ma ia ae tali ane le tamaititi, o mariuana o loo teu e lona tina i totonu o lana ato ae e alu e ave i lona tamā lea e faatali mai i Saanapu e alu e faatau.
O le Tulafono e lē mafai ona molia i le tulafono se tamaititi e 8 tausaga le matua pe i lalo ifo foi.
Ae e lē o iai foi se fuafuaga a Leoleo e ave le tamaititi lea ua aafia, e 10 tausaga le matua i le tulafono ona o loo manino le faaaogā e ona mātua ma o faatonuga nei o loo faamalosia lava e mātua i le fanau.
O le isi tina na faapea ona faia se tulaga faapea na faasala faafalepuipui lava.
O lana tama teine e 12 tausaga na sai tagapepa mariuana i lona tino ae taumafai le tina e ave i Amerika Samoa sa faatali mai ai se tagata o loo faataua ia fualaau faasāina mai i lea tina.
Faaalia e Leaupepe Fatu, e mautinoa lava e toatele mātua o loo faia nei uiga solitulafono ma faaaogā ai fanau laiti ae ona pau lava o lea ua maua lelei lea tamaititi ma ona mātua.
O lea la e tālia le tulai o mātua nei i luma o le Faamasinoga e tali atu i le faatau ma le umia o fualaau faasainiga.
Ae mo le tamaititi e lē o faamautu mai pe faia se moliaga pe leai foi.
