E ese foi le malie ma le taga eseese o vaaiga na oo iai le Aso Faraile ole vaiaso ua mavae, aso 31 o Mati ina ua tuufaatasia ausavavali uma e 11 i totonu o Aukilani ile malae o David Lange Park i Magele, e faataunuuina ai le aso fiafia sa atofaina ele pulega ole leitio Samoa, le faletua ia Ane Ponifasio faapea le tofa ia Teleiai Edwin Puni ma le tofa ia Sooalo Setu Mua ma le lagolago ale afioga ia Ulalemamae Teeva.

Ose faamoemoe sa saili ma sunui ile Atua aua se laolao ma se taimi lelei e mafuta faatasi ai pitonuu taitasi ina ia fusia tagata uma ile mafanafana ole alofa ma le fealofani ma faailoa le taua ole faatofala‘iga e pei ona taualagaina i aso taitasi ole vaiaso. Ma sa faailoa le alofa ma le agalelei ole Atua i lea aso ma maua ai se tau lelei ma le matagofie ma ua faataunuuina ai ma le manuia lenei faamoemoe.

Na amata le polokalame ile sauniga lotu na taitaia ele susuga ile faafeagaiga ia Motu mai le Walking Samoans i Magele, ona fetalai lea ole tofa ia Sooalo Setu Mua e faafeiloai le paia ma le mamalu o ausavavali mai pitonuu taitasi faapea le paia o Samoa potopoto sa mafai ona auai e molimauina lea aso.

Ole susuga ile faafeagaiga ia Lui Ponifasio ole Faatonusili ole galuega ale Radio Samoa, le nusipepa ole Samoa Times, ma le Moana TV, na saunoa i lea taeao e faafetai ile galuega fita oloo gafa ma Teleiai ma Sooalo e ala lea ile avea o laua ma faataitaiga lelei i tagata i savaliga i aso taitasi.

Sa faamalosi foi le faafeagaiga ile atunuu i lea taeao ile mau mai le afioga ale Atua, e faapea e leai se mea e sili nai lo lenei, ua ou faalogo ua outou savavali ile upu moni. Ole tāua o lea faamalosi ele gata ile savavali ile ola faaleagaga ae ole savavali foi ile ola ile tino, ma ia fai ai ei tatou se galuega lelei e tausi ai o tatou tino, aua o tatou lava e manuia ai o tatou foi e leaga ai o tatou tino.

I saunoaga ale afioga ile Konesula Aoao o Samoa ia Faolotoi Reupena Pogi ma le afioga ile Faipule ia Aupito Su‘a William Sio, na laua faafetai ai i galuega lelei oloo faia pea ele leitio ma nisi o tamalii ole atunuu, ole lagalaga i mea lelei aua lava le soifua manuia o tagata lautele ua le gata i tuaa matutua ae ua oo lava i tupulaga talavou lea talalelei aua oloo laua molimauina pea ile tele o aso oloo fai ai le savaliga i Magele.

O nisi o sui mai ausavavali taitasi sa lautogia i lea aso sa mafai ona tauaaoina atu iai pine auro faapea sui ole leitio oloo galulue faatasi ma ausavavali, lea sa fofogaina ele tofa ia Leulumoega Teleiai Edwin Puni e talimasinei ai le tulai o Samoa ma a latou galuega fai ma le faamaoni i savaliga i aso taitasi ole vaiaso.

Ole faamoemoe maualuga lava o lea aso, ole aso fiafia ma le faataunuuina ole savaliga tuufaatasi, lea sa vaevaeina ai i vaega e tolu le savaliga, ole au saoasaoa le savali, feololo le savali ma tina ma tamā matutua sa tapuaia le faamoemoe.

E maeu foi lagona fiafia sa molimauina mai i pitonuu taitasi, ae le gata i lea ua faaalia le loto fiafia ile maopoopo e ala ia latou togiga ma faasolo ua aulelei ai ma matagofie le faamoemoe.

Ile taimi o faafiafiaga na iloga ai loa ona sasae le mata ole aitu i faiga a toeaiina ma loomatutua ile faaalia o lagona ole fiafia i musika ma faafiafiaga sa tapenaina e ausavavali.

Ole pitonuu o Magele sa latou tatalaina faafiafiaga ile latou pese, ona sosoo ai lea ma Tamaki. Faasolo faafiafiaga ile pitonuu malosi i Sisifo, ma Otara ae taualuga ai loa ile auso fealofani mai Manurewa ma Clendon lea oloo taitaia mai ele afioga ia Vui Vitale ma le susuga ile faafeagaiga ia Amosa Kennar.

Sa maualuga ma matagofie le faamoemoe ole aso ina ua maitauina le toatele o tuaa sinasina lea e tai 70 tausaga agai atu i luga ile 90 tausaga o faamaopoopo lava ia latou pitonuu oloo savavali ai, ae faapea foi ile matagofie o tapenaga o pitonuu taitasi e ala ia latou faafiafiaga, lea lava ua faailoa ma fafagu ai le taleni fatupese ma siva a toeaiina ma loomatutua sa taulamua mai i aufaafiafia eseese.

E suifefiloi manogi ole lolo ole aso, ua maua le ‘ata, maua le fiafia ae sili ai ole maua ole mafutaga soosoo tau‘au ma le nofo fealofani o tatou tagata Samoa, aua o lenei polokalame e lei faapito manu ia tasi, ae sa tatala lava le avanoa ile mamalu lautele ole atunuu mo i latou e le o auai ise savaliga ae mafai lava ona auai atu e molimauina le aso fiafia ole Walking Samoans.

Lea lava sa maitauina i lea aso le taupati atu ole mamalu ole atunuu faapea sui ole malo o Samoa ile Konesula ia Faolotoi Reupena Pogi ma le faipule o Magele ia Aupito Su‘a William Sio faatasi ai ma sui o Local Boards ile molimauina ole faamoemoe.

Ole siui ole aso sa alo ai loa ausavavali ile taumafataga tele na saunia ele Radio Samoa, ma tufatufa ai nisi o faailoga mai kamupani sa latou lagolagoina lenei polokalame, e pei ole G-Mana Wholesale Autos lea sa fai le latou Se‘i i suafa e sefulu e manumalo ile $50 faatasi ai ma le $100 sa tauaaoina atu ise tasi o tina pito i matua sa auai mai le ausavali a Otara lea ua 91 tausaga le matua o lona soifua.

Ole Maston South Pacific ose tasi lea o kamupani sa tuu mai foi lana fesoasoani ile faamoemoe ole Walking Samoans lea sa tauaaoina foi le latou Se‘i ile meaalofa tupe e $200 faatasi ai ma le kamupani ale Amasee Pharmacy.

Ole faatofalaiga ale Walking Samoans ua avea lea ose talalelei ua maopoopo ai le komiuniti a Samoa mai pitonuu eseese o Aukilani, ua le gata ile tausia ole soifua maloloina lelei ole tagata, ae ose avanoa ua fesootai ai tagata uma o Samoa oloo aumau i totonu o Aukilani ma maua ai le nofo fealofani. Leitioa foi a pese ma saafi le faisamalo a Tavita, Se mea ina lelei ma le matagofie o uso ae nonofo faatasi.

Lisi o Au Savavali

North Shore

Henderson

West Auckland

Magele

Otara

Tamaki

Manurewa

Clendon

Central

Mangere East

Manukau

Au Savavali taitai e Malagamalii Alefosio

Comments

comments