Ua manumalo le finauga ale susuga ile Faifeau o Kerita Reupena ma lana loia le afioga Leuluaialii Olinda Woodroffe, sa toe talosaga ai ile faamasinoga apili e iloilo le faaiuga ale faamasino sili lea na faaleaoga uma ai le tagi ale faifeau faasaga ile faaiuga na aveesea ai le Tofi Toeaina ole Pulega a Kuiniselani sa umia e Kerita.
Ua aumai le faaiuga ale faamasinoga apili ua faapea mai e solitulafono le iuga ale au Komiti Faatonu ale Autoeaina ole ekalesia Faapotopotoga Kerisiano Samoa, ona e lei faia le amiotonu ile tatau lea ona ave se avanoa ile susuga Kerita e tuuina atu sana faamatalaga e tusa ole mataupu sa faavae ai le faaiuga e aveese lona tofi Toeaina ole Pulega.
Peitai ole talosaga ale faifeau ma lana loia e toe suesue atoa le tagi ua teena ele faamasinoga o talosaga apili.
Ua faapea foi ona le talia le isi vaega ole apili e faasino ile pitotasi ole faaiuga ale Faamasino Sili aemaise ole tuua‘iga sa le tatau ona faatautaia ele faamasino sili le mataupu ona o lona sootaga ile ekalesia aemaise sa nofo aitalafu le faletua ole faamasino sili ise lisi o lana pisinisi sa faagaioia ise vaega ole maota ole Ioane Viliamu i Tamaligi ose meatotino ale EFKS. Ua ioe le faamasinoga o talosaga apili e lei silafia ele faamasino sili se aitalafu a lona faletua. Ile vaega ole iuga ua solitulafono ai le iuga ale Komiti Faatonu ale Autoeaina ona e lei faaleoina se finagalo Kerita, ua faaalia ai ele tamaitai loia le afioga Leuluaialii Olinda Woodroffe, ose iuga ua avea ma amataga fou mo faaiuga a faifeau Toeaina ole EFKS ma nisi ekalesia i Samoa ona ua manino ai e tatau ona faia le amiotonu ile sailia uma o finagalo o itu ose mataupu oloo suesueina a‘o lei faia se faaiuga ma e ta‘ua lea ole natural justice.
Ole isi vaega ua faamautu mai ile faaiuga ale faamasinoga o talosaga apili, ole feagaiga na osi ele faifeau ma lana aulotu ile va ma le ekalesia aoao ose konekarate.
Ua faapea mai le iuga na fofogaina ile Aso Faraile ua mavae, e iai le sasi ole faaiuga na faia ele faamasino sili ile itu lea ona oloo manino ile faavae ole ekalesia ole faatinoga o tiute ole faifeau pe a mae‘a ona osi feagaiga ma le aulotu e lima taitaiina i aiaiga ole faatinoga o tiute tauave ole ekalesia aoao.
Faaalia e Leuluaialii Olinda Woodroffe ua tatau i faifeau o pulea le ekalesia ona toe faataoto se alafua lelei e iloilo ai a latou faaiuga fai aua e tele tupe a tagata lotu oloo foai mo le lotu ma le ekalesia, aemaise na ia faamamafa le itu o faifeau e le o ni Atua ae o auauna mo le faia ole galuega mo tagata e pei ona finagalo iai le Atua. “Ole faia ole amiotonu ole mea pito sili lea ona manao iai le Atua ma ia tausolomua latou o faifeau ona savavali ile fai mea tonu”.
Ole susuga Kerita ma lona faletua ua le o toe galulue mo le EFKS ae ua tutoatasi le latou aulotu. Na amata lea suiga ile tausaga ua mavae ina ua aveese ele Autoeaina lona tofi Faifeau Samoa (FS).
Faaalia ele faifeau ua faaigoa nei lana ekalesia fou ole EFKAS o lona faaumiga ole Ekalesia Faapotopotoga Kerisiano Ausetalia Samoa. Na ia ta‘ua ole toatele ole aulotu oloo tapuai pea faatasi ma i laua ma lona faletua ma lona aiga ae o nisi ua solomuli ese ma ua faaaauau lo latou ola tapuai i nisi aulotu EFKS i Kuiniselani i Ausetalia.
