E tasi le ‘auga ma le faamoemoe ia faafaigofie ona momoli atu nei auaunaga i tagata lautele ma ia laasia se lumanai manuia auā a tatou fanau aoga Pasifika i Mangere ma totonu o Aukilani i Saute. O le taimi muamua lea ua faia ai se polokalame faapenei i totonu o se faletusi i Aukilani, ua tuufaatasi ai auaunaga a Aoga ma Matata eseese e faalauiloa mataupu auā le faasauni atu o le fanau aoga mo le tausaga fou.
O le polokalame na tuufaatasia e le Faletusi i totonu o le taulaga faatau a Mangere (Mangere Town Centre Library), ma le faamoemoe o se auaunaga mo le atunuu lautele, e molimauina ai avanoa eseese o loo agavaa i ai alo ma fanau, aemaise i latou ua mae‘a aoaoga i Kolisi, ae ua lē ausia togi mo se avanoa i Iunivesite.
Na molimauina le faatumulia o le nofoaga ma le lolofi atu o mātua faapea le fanau aoga i le taeao o le Aso Lulu na tea nei, e faatalanoa ni faamatalaga mai sui o Aoga ma Matata eseese mo se isi laasaga o aoaoga mo le fanau i le lumanai.
O se fiafiaga sili lea i le tamaitai Pule ma le aufaigaluega, ona o le tali atu a le atunuu, aemaise ua faigofie ai ona maitauina se manaoga o loo feagai ma le toatele, o le fia malamalama atili lea i ni faamatalaga tau i aoaoga, ae o le faafitauli, o le mamao o tulaga ma nofoaga o aoga, ae peitai ua aoga le Education Provider Expo ua aumaia faatasi ai auaunaga eseese nei i se nofoaga se tasi auā le faafaigofie mo femalagaiga a le atunuu.
Tele aoga sa auai o latou sui, e aofia ai le MIT, NZSE, Martin Hautus, MSL Training, Quality Education i Mangere, NZ Career College ma le tele o nisi auaunaga. O loo iai le faamoemoe e toe faaauau lenei tautua mai le Faletusi i le taulaga faatau i Mangere i se masina o le faaiuga o le vaiaso.
