Ua mautinoa i galuega faatino mo le laveaia o tagata, e tele lava le manaoga e iloa e le atunuu le faiga o fesoasoani muamua. Ua mafua lea manatu i le matauina o le tele o maliu e tulai mai ona o le leai o se fesoasoani muamua e mafai ona faia ia i latou e moomia lea fesoasoani.
O le mau lea a le Vaega o tali o faalavelave faafuasei sa auai atu i le Nofoaga tutotonu o le Koluse Mumu i Samoa i Tuanaimato auā le faamanatu ai o le aso o le Fesoasoani Muamua – First Aid Day.
O le suiga o se taunuuga o se faalavelave e faamoemoe uma i le taimi lea e ofo atu ai le fesoasoani muamua i soo se tagata ma o aoaoga na faatautaia i sui o le Koluse Mumu ua tufa atu i autalavou ma isi faalapotopotoga o nuu ina ia mautinoa o le a mafai ai e le lautele o le atunuu ona ofo atu lenei fesoasoani i soo se tasi e aafia i se faalavelave.
Ua mae‘a la aoaoga i ia faalapotopotoga ma o latou sui lea la na faatautaia ai loa se sauniga i le faaiuga o le vaiaso ona o le manaoga e tino mai ni suiga i le fuainumera o i latou ua maliliu ona o le tuai ona ofo atu i ai o le fesoasoani muamua.
Sa iai foi le fuafuaga e tatau ona faamalosia lenei ituaiga aoaoga i totonu o aoga a le atunuu peitai e lei tino mai lava lenei faamoemoe sei vagana ai aoga e talosagaina lava e i latou le Koluse Mumu ina ia faatautaia aoga nei mo le fanau laiti.
Ta‘ua e le Vaega o Fuimu ma Tali o Faalavelave faafuasei le tāua tele o lenei tomai ua faasoa atu e le Koluse Mumu.
O lea sauniga na tufatufa ai tusipasi a i latou ua maua lenei tomai ua mae‘a ona aoaoina ma o se polokalame faaauau lenei a le Koluse Mumu ua faagasolo pea i totonu o le atunuu.
