Ua mae‘a le taamilosaga muamua o le HSBC Sevens o le lakapi taitoafitu i le vae na amatamea ai Gold Coast i le faaiuga o le vaiaso na se‘i mavae pei ona silafia. O lea ua siamupini ai nei Fiti ina ua malolo si a tatou Manu Samoa i le sailiga siamupini o le ipu autu i ‘ai e 31 Fiti i le 24 a le Manu Samoa.
E ui i lea malolo a ua faafetai ua mafai ona toe ausia e le Manu lea tulaga, ua fai foi si leva e lei toe oo i ai i le tele o vae o le taamilosaga ua mae‘a atu. O le tulaga lua ai o le Manu Samoa i Gold Coast ua amata tapena ai ni ‘ai auā le tausinoaga mo se avanoa e tauva ai i le Olimipeka ma le faamoemoega ia aveaveai ai lea tulaga lelei ua ausia i le taimi nei.
Ua faalogoina foi i luga o alaleo i fefaasoaaiga a le atunuu, ua o se faaiuga faafiafia loto lo tatou sao i le Final i le vae na se‘i mavae atu nei.
I le faagasologa o le tatou taaloga mulimuli lea ma Fiti, fai si tuai teisi o le tatou ‘au pe a fua atu i le sikoa faalua a le alii Fiti, Setefano Cakau i le ‘afa muamua o le taaloga, a o ‘ai faaopoopo mai i sikoa a Apisai Domolaili ma Semi Kunatani lea na 26 ai i le leai a Samoa.
Ae peitai o le toe mimilo i le pioga a Fautua Otto na tau ‘ai ai Samoa a o lei maea le ‘afa muamua o le taaloga. E ui i lea, o se taaloga finau le puipui mai a le Manu, auā ana lē lelei le vaai semanu e felelei lava vaalele a Fiti ma sikoa. Ae ona e lei tuumamaina foi e tama matu o le ‘au le susuga ia Lolo Lui le laasia o le laina sikoa mo se ‘ai faaopoopo mo Samoa, a o Siaosi Asofolau ma Tila Mealoi i le faatini i ni nai minute e fā mulimuli a o lei ili le faili a le laufali ua mae‘a le taaloga.
E ui i nei taumafaiga a nai tama e tulitatao atu ni ‘ai ma puipui atu le toe sao o Fiti mo se ‘ai faaopoopo, ae ua fai lava si tuai ina ua toe kolosi e Jasa Veremalua o le ‘au a Fiti le laina sikoa ma toe maua le isi ‘ai mo Fiti, faasima ai loa ma le ipu i Gold Coast ua manumalo Fiti i lea vae o le taamilosaga, ‘ai mulimuli o le taaloga, 31 Fiti i le 24 a Samoa.
Peitai sa mataina lava le taumafai a si a tatou Manu Samoa, lea e ui i le leva na lei tau ‘ai i le amataga o le taaloga, peitai na finau mai lava e finauina so tatou manumalo i Gold Coast, ae pagā lea ua pau lava.
O le Manu Samoa lea ua tofia i le Pool A faatasi ma Niu Sila, Falani ma Iapani. O Niu Sila sa tulaga muamua i le tatou Pool tulaga lua ai le Manu Samoa, peitai na lē manuia taumafaiga a Niu Sila mo se avanoa i le ipu autu, ina ua malolo ia Egelani i le Quarter Final, 7 i le 31 a le ‘au a Egelani.
Ae mataina taaloga o pool games, pei ona sao mai ia Iapani, manumalo i ‘ai 40 i le 14 a Iapani i le taaloga muamua o le taamilosaga. Taaloga lona lua na fetaui ai ma Falani, manumalo foi Samoa i ‘ai e 19 i le 12, se‘i vaganā ai le taaloga ma Niu Sila na malolo ai i ‘ai e 28 i le 17.
Na sao Samoa i le Quarter Final ma manumalo i le la taaloga ma Argentina, 24 i le 21 maua loa ma le avanoa e feataui ai ma Aferika i le Semi Final ma lami ai le Manu 28 i le 12 a Afelika.
E ui a la ua lē manuia le taumafai a le Manu Samoa mo le ipu autu i le vae lea o le taamilosaga i Gold Coast, ae peitai ua toe ala mai le Manu ma amatamea i se iuga faafiafia loto mo Samoa ma lana tapuaiga ma le faamoemoega i se taunuuga manuia o le isi vae o le taamilosaga lakapi taitoafitu lea o le a faasauni atu i ai i Dubai i le faaiuga o le tausaga nei aso 5 ma le 6 o Tesema.
