O le loto faafetai ma le lagona ua tatau ai le viiga i le Atua lea ua pese ai si o matou tina peleina faatasi ai ma fanau uma ma aiga o loo ta‘ape ma alala i soo se vaega o le kelope ma tatou faapea ane faatasi, “Lo‘u Agaga e, ia faamanu atu i le Atua, o mea uma foi o i totonu ia te au ia matua saga faamanuina ai lona Suafa Paia”.
O le upu masani foi a le gagana, O le faamoemoe ua taunuu o le laau o le soifua manuia lea, auā o lele ua mae‘a ma ua uma ona faataunuu le faamanatuina ma le faatāuaina o lou aso soifua Tina, tatou faafoi laia o le viiga i le Atua e le aunoa.
Si o matou tina peleina Vaalele Toomata Afamasag Frost, malo le soifua lagimaina auā o lele ua aoina le masina e ala i lou soifua ua faamanuiaina ai oe e le Atua ma ua alalaga fiafia ai lau fanau uma ma nai ou aiga mai soo se vaega o le lalolagi nei, ina ua aulia manuia mai e oe lou 90 tausaga.
Amuia lou soifua tina Vaalele, auā o foliga vaaia la lea o le faataunuuina o le tulafono e 5, “Ia e ala i lou tamā ma lou tina ina ia faalevalevaina ai aso o lou soifua”. Malo faafetai tele mo au galuega lelei mo soo se tasi lava o i matou lau fanau aemaise lava foi o ou aiga uma. O lau tautua e faasafua e le faailogaina se tagata auā e afifi ai lou alofa ma lou faamaoni e faataunuu le finagalo o le Atua. O lou aao mafola, o lou agalelei i lagona ma manatu aemaise o fautuaga ma lapataiga mo lo matou ola tapasaina ina ia manuia ma saoloto, ae faasilisili lou faanaunauga i le tapasaina ma le tapenaina o matou olaga faakerisianoina e ala i le aoaiga ma le aoaoina o le ola tautua mo le finagalo o le Atua, faasiliina foi lou faleaoga faasoa mai i le aganuu ma le tausiga o lo tatou aiga i soo se vaega ina ia faaauau pea le soifua fealofani ma le fetausiai.
Malo fai o le faiva faatina mama, faafetai i lou soifua auauna mo le Atua i soo se mea aemaise o lau tautua matavela mo ou aiga ma au fanau ua matuā toatele, ia saga viia ma faamanuina ai le Suafa o le Atua e faavavau. Ia tina Valele ia manuia tele lou aso soifua ina ua e sagisagi fiafia e ala i le faamanuiaga mai le Atua lea ua e maua le 90 o tausaga o lou soifuaga.
O le Aso Toonai sa faia ai se mafutaga matagofie na saunia lelei ai e nai ona alo uma se ‘aiga fiafia na faamanautina ai le alofa o le Atua i le tina ma faatāuaina ai le atoaga o lona 90 tausaga i le aai tele o Gold Coast i Ausetalia, sa auai atu i ai le toatele o nisi o vaega o fanau sa fai ai foi latou ma sui mo aiga taitasi ia i latou e lei saofia atu i ai.
O faamanuiaga ma moomooga alofa e lē mavae mo oe le tina peleina mai lau fanau uma lava, o fanau a au fanau uma, o fanau o fanau a au fanau uma, aemaise o ou aiga uma mai soo se vaega o le kelope. Ia manuia tele lou aso soifua Tina Vaalele Toomata Afamasaga Frost.
