E faagalo gata i aiga uo ma ē masani aemaise o auauna a le Atua i le Talalelei uiga tausaafia o le susuga i le faafeagaiga ia Tuiloma Peter Crichton, e lē gata i musika e pei ona fiafia i ai le atunuu ma Ekalesia eseese e faafofoga i ana fatuga, ae o galuega faatusitala ma faasalalau e pei ona iloa ai e le toatele, aemaise o le tele o taaloga o loo talenia ai.
O se tamalii sa aoaoina i le kolisi o Avele i tausaga ua tuanai, ma sa galue muamua i le ofisa o le tiute i Samoa, ona sosoo ai lea ma le faletupe o le Development Bank, sa avea o se tusitala i lona uncle o Liki Crichton i le nusipepa o le Samoa Weekly, ma see mai loa amata lana pisinisi o le nusipepa o le Monalisa, sa fai ana taxi, ae sa maua foi lona avanoa i le USP e study ai i le faatusitala ma le faasalalau, (Journalism).
Na galulue ma lona faletua ia May i totonu o le galuega a le Youth For Christ (YFC) a o taitai ai le susuga i le faafeagaiga ia Tavale Mataia. I le tele o polokalame a le fanau i Samoa aemaise o luga o leitio na maitauina ai le gauai o le faafofoga o le atunuu i le malu o le siufofoga o le tamaitai ia Monalisa Crichton a o fai ana CD pese i lona laitiiti.
O le tausaga e 1987 na tuua ai loa Samoa ae malaga mai i Niu Sila mo le saili manuia mo aiga, e ui i le suiga fou i le atunuu ua aumau ai ae lē mafai ai ona aveesea le taleni ma le meaalofa a le Atua ua tuuina ia te ia.
Ae o se avanoa lelei ua mafai ona toe galulue faatasi ai ma le susuga ia Tavale Mataia i le Pacific Island Ministry a o avea ai Tavale ma taitai o lea faalapotopotoga.
O le tausaga e 1991 na laua faavaeina ai ma le faletua ia May le nusipepa sa faaigoina o le Manu Samoa a o iai le ‘au a le Manu Samoa i le World Cup, ma sa galulue faatasi ai ma le afioga ia Peseta Savea Al Haritona Lavea, Iakopo Tonipau ma le faletua faapea le susuga ia Malo Muavae.
Ma o le vaitaimi lea sa avea ai Tuiloma Peter Crichton ma faatonu o lea galuega, faatasi ai ma nisi o nusipepa sa ia galueaina e pei o le Tusitala Samoa. E 3 tausaga na aoaoina ai i le Bible College of New Zealand, ma o se uluai tamalii foi na ia faafoeina se polokalame Samoa i luga o le leitio faatasi ai ma le susuga ia Tavale Mataia ma nisi o le atunuu na mulimuli atu i lea vaitaimi.
O ana fatuga ma pese ua lauiloa ai i le lalolagi, aemaise o totonu o Ekalesia, e pei ona faaaogāina e le tele o autalavou i polokalame faaleagaga, na fofoa mai lenei taleni a o ia taitaiina le aufaipese a le Youth for Christ i Samoa seia oo ina faaauauina le taleni i musika i le Ministry sa galulue ai i Niu Sila, na ia taitaiina team aufaipese faaevagelia i Papua Niu Kini, Tonga, Ausetalia ma Samoa.
O le saili malo ma le ola finau na oo ai i le faia o lana recording e pue ai ana pese faatasi ai ma le fesoasoani i tagata ua lē gafatia le totogi i isi kamupani pue pese, faatasi ai ma ana polokalame i luga o le CCTV i Kalaiesetete faapea foi le Triangle TV i Aukilani.
E tele le ‘oa ma le tamaoaiga o le Atua sa tuuina i lea auauna, ae lē gata i lea o meaalofa ma taleni e pei ona tautua ai i totonu o le atunuu ma Ekalesia. Na laua faavaeina le Ekalesia o le New Generation Praise Centre i le tausaga e 2000, ina ua sui le valaauina mai le Atua.
O le isi Ekalesia o loo i Brisbane i Ausetalia o loo galulue ai le susuga i le faafeagaiga ia Frank Moli ma le faletua ia Neetia Moli. O le molimau a le Tusi Paia ia outou o atu e fai nuu uma lava ma soo, ma o le manulauti lea sa malaga ai faaevagelia i Aferika, Uganda, ma Somalia e ave i ai le faaolataga a Iesu.
E ui i le motusia o le mafutaga i le tino nei i le malaga a le oti i le susuga i le faafeagaiga ia Tuiloma Peter Crichton, ae molimau le Tusi Paia e lē faia mo tatou lenei olaga, ua na o se nofoaga tatou te tapena ai mo le lagi fou ma le nuu fou, o le ola lea e faavavau ua saunia e le Atua mo lana fanau.
Amuia lea auauna ua valaau mai lona matai ae o loo galue pea mo le Atua ma lona malo. Le Auauna lelei e ma le faamaoni ulufale maia i le fiafia o lou Alii.
E momoli atu ai ma faamaisega mai le YFC Samoa ma Niu Sila nei aemaise o le Pulega a le Radio Samoa ma le Samoa Times faapea le Moana TV i le faletua ia May Tuiloma ma le fanau ona o le ao pogisa ua ufitia ai le aiga ma le ekalesia.
Le oti e, o fea ea lou tui, le tuugamau e, o fea ea lou manumalo? Amuia ē ua oti, oti o i le Alii. O le Atua na ia aumaia o ia foi na te toe aveeseina. Ia faamanuina le Suafa o Ieova!
