O le faaiuga o le vaiaso nei ua fuafua e faia ai toe sauniga ma falelauasi le tina talavou o Fatima o le afioaga o Leauvaa uta lea na faamanu‘alia ni vaega o lona tino ina ua faaoolima i ai lona toalua le tamaloa o Toni mai Satapuala ma Foailuga i Savaii.
O ni manu‘a ogaoga ma tuga ma aafia ai le ulu, ma le fofoga poo le gutu o le tina aemaise o ona lima. O se faaoolima o loo masalomia na faaaogā ai e le tamaloa se tolopa ma se maa tu‘i koko e pei ona faamatala e le tuagane o le tina o Fatima ma se alii o se maupaolo i le aiga e nonofo ma le tasi o uso o Fatima.
Na asia e le tusitala le aiga ona o le fia fesiligia o se latou faamatalaga i le mea tonu na tupu, talu ai le tele o faamatalaga aemaise o lipoti mai leoleo ua lē o maua tonu ai se manino ona e ese foi faamatalaga a nisi tagata e latou te silafia le faalavelave na tupu.
E sa‘o lava le oo iai o le tusitala ona na faaalia ai e le tuagane o Fatima ma se maupaolo o le aiga le sese o lipoti ua faalogo i ai. O le mea muamua na faailoa e le aiga o le faamatalaga mai leoleo e faapea na susunu i se sikaleti le fatafata o le tina o Fatima e lē sa‘o. Fai mai le tuagane o le tina ua maliu le afioga Lauano, o le po tonu na sau ai le taaloga a le Manu Samoa ma Aferika i Saute i le taamilosaga o le Ipu o le lalolagi na tupu ai le faalavelave.
“O le Aso Toonai lena na sau ai le tamaloa o Toni mai Satapuala i le aiga sa nonofo ai ma lo‘u tuafafine e manao e avatu lona afafine pepe na sau Fatima ina ua alu ese ma Satapuala ma aumai”.
“Na sau le tamaloa o Toni ma valaau mai i lo‘u tuafafine e alu atu, na fai ai a la tala i luma o le matou fale i le afiafi lena, ae na toe alu ese ina ua ita tele”. Na faamatala Lauano na alu le tamaloa ma ave le la pepe (afafine laitiiti) ae sa tuliloa atu e lona tuafafine ma lona tina ma le isi tamaloa o le maupaolo o le latou aiga.
Na oo le tuliloa i tai i le magatolu o le auala e faafesagai ma se faleoloa o loo iai ma fai ai loa faiga tala ma iu ina aumai le pepe. Na fai ai foi ma le tonu e agai loa i le ofisa o leoleo i Afega e ave i ai le mataupu.
Na faamatala la le maupaolo o le aiga e nofo i le isi uso o Fatima e faapea o ia na latou o i le ofisa o leoleo. Na faamatala le mataupu ma fai ane ai leoleo e sili ona o se‘i saili mai le tamaloa o Toni. Na fai ai loa le faamatalaga a le tamaloa ma taunuu ai leoleo i le faaiuga e foi le fafine o Fatima ma ave le pepe i lo latou aiga i Leauvaa uta ae o Toni ua sa ona toe alu i le aiga ae alu loa i Satapuala i le aiga sa nonofo ai.
O le faamatalaga a le maupaolo (taofia le suafa) na teva atu Fatima ma lana pepe ona o le fasi soo e lona toalua. E alu atu ua aafia lona fatafatafa na mu i se vaivevela, ma e lei logoina ai le ofisa o leoleo ona o le manatu o le tina e sili ona taatia ona e alofa ia Fatima ma lana fanau.
E fā masina o nonofo le tina ua maliu ma lana pepe i lo latou aiga i Leauvaa e lei toe foi i Satapuala. O le la tama teine matua ua 3 tausaga na toe ave e le tamaloa na lana nonofo lea sa ave le teineititi ma tausi e se tasi o aiga e faapea sa nofo ai le tamaloa ona e lē o se latou nuu lea ae o lo latou nuu moni o Foailuga i Savaii.
O le Aso Toonai lea na o ai i le ofisa o leoleo i Afega, na foi Fatima ma lona tina i lo latou aiga ma le talitonuga e lē toe oo atu lona toalua. Peitai na faamatala le maupaolo o le afiafipo o le aso lea na ia faalogoina ai o tauvalaau ane le tamaloa o Toni ma e foliga e ‘onā.
Na savali ane i ai ma ia vaaia o loo talanoa ma Fatima ma le tina o Fatima i luma o le fale ma sa ia molimauina ua leotele ma sii le leo o le tamaloa ua toatamai. Na iu ina savali atu i ai ma valaau i le tamaloa e sili ona alu ese ae lei oo i ai se isi tulaga.
Fai mai le maupaolo na togi atu o ia i se maa e le tamaloa ae na misi, ae sa mafai ona ia maua Toni i tafatafa o le paipa i fafo ma ia faaoolima loa i ai. O le fasiga lea na taatiatia ai ua lē mafai ona tu i luga e pei ona faamatala lava le maupaolo.
O nisi o taulelea o se aiga lava i Leauvaa sa nofo muamua ai le tamaloa o Toni lea na nonofo ai ma Fatima na latou sa‘esa‘eā le tamaloa ma ave faamoe i lo latou fale.
Fai mai le maupaolo na oo atu se tasi o taulealea o le nuu e lē mamao lona fale ma le aiga o lona toalua ma fautuaina o ia e sili ona la o e moe i lo latou fale ina ne‘i tupu mai se vevesi pe a ala a‘e le tamaloa o Toni. O le tala a le maupaolo na usitaia i le fautuaga ma la o ai loa.
Poo le fā i le vaveao o le Aso Sa na sosoo ai na faamatala le maupaolo a o la matamata i le taaloga a le Manu Samoa ma Aferika i Saute, ae faalogoina loa le sailini o le taavale a leoleo o agai atu i lo latou pitonuu i uta.
Na tu i luga ma savali ane loa i lo latou aiga ma faapea ona manatu, ai o se tagata ua pule i lona ola poo se isi faalavelave ua alu atu ai le taavale a leoleo.
Na faateia ina ua oo ane i le aiga o lona toalua o loo tumutumu atu tagata, ma lona vaai ane o le fafine o Fatima le uso o lona toalua o loo taatia mai fafo o le fale tele i luma, ua lava toto lona tino.
O le tina o Fatima na ia faamatala e faapea o le po lea sa moe ai i luma o le faletele ma Fatima ma nisi o le fanau aemaise o le pepe a Fatima e valu masina. Sa moe i luga o le moega, ae na te‘i i luga ina ua faalogo atu e pei o se tagata o loo taagulu mai fafo o le fale.
Na nofo i luga ma alu ane ki le moli, ma ia vaaia ai le tainamu sa momoe ai Fatima ma lana pepe o loo toto atoa le vaega sa moe ai si ana tama teine. Na faateia ina ua feala mai ma nisi o lo latou aiga sa momoe i le faleoo i tua e lē mamao ma le faletele, ma tauvalaau ane o Fatima o loo taoto i fafo.
Na faamatala le tuagane o le tina le afioga Lauano, na maua i tafatafa o le paipa le maa tu‘i koko lea na alu ma Toni i le afiafi e tau togi ai le maupaolo o le latou aiga, ma e maua le maa o loo toto atoa se vaega o le pito. Na agai ane ma vaai le tainamu ma maua ai se tolopa i tafatafa o le puipui o le fale i totonu.
Na latou sii lona tuafafine i le taavale mo le auina i le falemai ae sa faateia i le tago atu i lona ulu o loo tele se manu‘a i le pito i tua poo le muliulu. O ona lima ua pipio ua lē mafai ona faasasa‘o ma ua lē mafai ona tautala ane ae na o le oi o foliga o le tagata ua matuā tigaina i ni manu‘a tuga ua aafia ai.
E tusia lenei lipoti o loo faia suesuega a leoleo ma ua taofia le tamaloa o Toni lea na sola ina ua uma ona ia faia le faalavelave, ae na sue e leoleo ma maua. O le faaiuga o lenei vaiaso o le a faia ai taotoga faapitoa e sailia tonu ai le mafuaaga o le maliu o le tina o Fatima ona faatoa mafai ai lea ona tuuina atu i lona aiga mo le faia o ona toe sauniga.
O le faamatalaga a le tina o Fatima e fasi avā tele le tamaloa o Toni ma e lē faatasi ona faia lea gaioiga.
