Na vaaia le lagolagoina e tagata Pasefika ma Samoa i Sini nei le savali ole tetee i sauaga i totonu o aiga faapea i tina ma tamaitai sa faafoeina ele Ofisa o Leoleo i Cabramatta ma Fairfield. O lenei savali sa valaaulia ai taitai ma faalapotopotoga o soo se atunuu e aofia ai Samoa i Cabramatta sa taofia ai taavale ae savalia ele tusa ma le 200 tagata ile magaala autu.
Sa fai ai sui ole Fono Aoao o Samoa ma amepasa i lea solo na aafia ai ma fanau aoga laiti lea e faapea, o latou nei o mafatia i nei vaaiga i aiga ma sauaina foi.
Na amata mai le PCYC le solo ae tini ile Plaza a Cabramatta lea na saunoa ai le Alii Suesue Sinia ia Darren Newman e faafeiloai le aofia. O Newman ua valalata lana galue ma taitai Pasefika aemaise Samoa i Sini i leoleoga i fale faatali pasi ma nofoaafi ma le asiasi i aiga o fanau ua lamatia olaga.
Na saunoa foi le Pulenuu o Fairfield ia Frank Carbone e momoli le faamalo ma le faafetai i mātua, fanau ma le ausavavali ole afifio atu e amanaia lenei faamoemoe. Na sosoo ai ma le molimau ale Supalutena Faatonu Wayne Murray ma ia faalauiloa ai ua avea nei ma misiona autu a leoleo le tineia ma molia o latou e faaoolima i tina ma tamaitai faapea foi le sauaina i upu ma le faamata‘u o soo se tasi i faigauo ma ulugalii.
Ole sui ole Palemene MP Chris Hayes ole amepasa ole White Ribbon day sa ia faapupula atili, “Ua lē toe talia e Ausetalia nei faiga sauā ma o i latou pagatia ose afafine, tina, alo pele ose tasi e alofa tele iai ae peitai o lea ua oo iai nei tiga.” Ose lagona lava foi na faamatala ele saunoaga ale Sui faipule a Cabramatta ia Nick Lalich lea na faatusaina le ootia ma le faavauvau o nei manu‘aga i nai fanauiti pe afai e sauaina tigaina ma vaavaai i nei solitulafono i aso uma ma taimi o tupu tupu a‘e ai.
Sa taualuga i pese ma faafiafiaga a aoga e faapupula ai le leaga o manatu ma lagona o fanau e aafia, ma taualuga ai ise BBQ na atili maua ai le avanoa e faasoa ai leoleo, le auvalaaulia ma tagata lautele.
