E feilafi ma taugata le penina tautele, e iila le auro, e anagatā le maatāua o le alapasa, ae lē faatusalia se sao tāua o se tina i se aiga.
O se fugalaau e mamae ae lē mafai ona mou ese atu lona matagofie i le vaai aemaise le sasala e tosina i ai ma ofaga i ai manufelelei auā na te pua‘ina mai le nanamu o le ola. Amuia ē faanoanoa auā e faamafanafanaina i latou!
E ui ina oona matuitui le tui o le oti, peitai e leai a sē fai loto auā e toli le matua e fa‘i foi le moto. O le afiafi o le Aso Tofi, aso 5 o Tesema, na faia ai sauniga faaleaiga o le tina matua ia Seālamutu Lilomaiava mai Levi Saleimoa & Safotu e pei ona valaauina ai e lona Matai.
Na taitaia sauniga faaleaiga e le susuga i le faafeagaiga ia Luao Matai‘a, le toeaina ia Sauaiga faapea le lauga sa fofogaina e Pr Faamalologa Fuesaina, Ekalesia Aso Fitu Samoa Tutoatasi, ma le lagolagosua a le susuga ia Rev Isamaeli Liaina o le ekalesia EFKS.
Tele aiga na paau mai ona o le molimauina o toe taimi o le Tina matua. O se tina e leiloa pe ita ae o le alofa ua faagalo gata i loto ma finagalo o tagata uma.
O ona toe sauniga i le aso faaiu sa saunoa ai le taitai matagaluega ia Pr Lagolago Levae ma faamamafa lava e lē o toe lagona e le tina, peitai o se faamalosi le feau mo i tatou o ola pea ina ia tapena i le faamoemoe i tua atu o le tuugamau. Sa fai sao foi le toeaina o le matagaluega ia Tamala Folau Fetoai ma susuga i faafeagaiga ia Foa Vaeluaga ma Luao Matai‘a.
O le fale faasausau o le Toomata Funeral Services sa taoto ai le tina ma faatinoina vaega uma i le feaveaiga. Na malaga mamao mai lava le afioga ia Ta‘uo Siaki Valu Toomata ma lona soatau le afioga ia Mauinatu e faataunuuina fuafuaga i le fale faasausau.
O le fofoga o aiga ga lua o le afioga ia Lilomaiava Lilomaiava, ae o le fetalaiga ia Sauaiga Koli sa ia molimolia se agaga faafetai auā le ekalesia ma Samoa na potopoto. Sa fesuia‘i felanulanuai le taumafaga sa tapenaina e le Uncle Sam’s Take Away, le tofa ia Poulava Sam ma le tausi ia Lorna Matautia faapea le aufaigaluega.
