O ona foliga lalelei i lona talavou a o 25 tausaga o lona soifua, ua toe malaga mai i Samoa ua 87 tausaga o lona olaga, ae ua faamatala le tina o Roberta Haynes, e lē mafai ona galo ia te ia uiga faauo o tagata Samoa, o le faaaloalo ma le tausaafia.
Sa ia faaamatala ma ona lagona ootia ma toetoe a toulu ai ona loifofoga ina ua tuufesilisili atu le tusitala se‘i ona faamatala uiga ma vaaiga o Samoa i le tausaga e 1952 na malaga muamua mai ai i Samoa, ona o ia o se tasi o tagata sa autu i ai le ata tifaga o le Return to Paradise poo le Toe Foi i le Parataiso.
Fai mai le tamaitai e lē galo ia te ia nisi sa latou masani ona o le ata tifaga, e pei o le afioga i le Tamaaiga le Afioga Mataafa, auā sa mafana tele i ai lana mafutaga i le aiga o le Tamaaiga e pei o le tina o Sala.
O se tasi o aso na alu atu ai Mataafa i le taxi ma la tietie i le fale asikulini o Moore sa i se vaega o le taulaga i Apia, ona uma lea malaga i Lepea e faalogologo le leitio shortwave.
O aso ia e na o le leitio lava le auala o fesootaiga e iloa ai tala o mea e tutupu. Sa fai ai foi le latou taligasua i le maota i Lepea ona pepese lea o tamaitai e leoina le maota, ae fai lana malologa.
Na ia faamatala foi lana masaniga ma se faigauo ma nisi o aiga e pei o le tamaitai o Freida Keil Paul, sa a‘oina lana siva Samoa mo le ata tifaga. O lea ua toe malaga mai i lana malaga lona lima i Samoa, ona o le faamanatuina o le 61 tausaga o le ata tifaga, ua toe feiloai ai ma le tina o Freida.
Ua toe feiloai atu i nisi sa latou iai i le ata tifaga, e pei o le susuga Unasa Felise Vaa, ma nisi o loo soifua mai pea.
O nisi o aiga oi latou mai Samoa sa faaaogā i le ata ua latou feiloai atu ia Roberta ma faamatala i ai tala a o latou mātua i le taimi o le ata.
Na fesiligia le tamaitai i sona lagona, i le tala ua aumai e lea ata tifaga ona e foliga o le taunuu o Morgan Tane i le motu o Matareva lea ua faaigoa ai se tasi o matafaga i Lefaga, na amata suia ai le pule tutasi a le misionare i le motu i olaga o tagata o le nuu.
Na soisoi Roberta ma ia faapea mai, atonu o se vaai lea i ai a tagata i Samoa ma faauiga le tala mai le ata tifaga, ae o na ona po ina ua maimoa i ai le lalolagi aemaise o tagata i Amerika, e lei iai so latou manatu tele i lea itu.
Na fesili le tusitala o lenei lipoti i le tamaitai pe ua iai se suiga o tagata Samoa i lena taimi, ma lenei taimi ona o suiga e tele ua iai le atunuu.
O le tali faigofie a le tamaitai, e lē o suia lava uiga faaleuo ma le fiafia o tagata Samoa.
Fai mai o ia, o uiga foi ia sa iai tagata o le atunuu i lea vaitaimi, peitai o lana molimau ua suia le tele o vaaiga i Samoa, ae o lona matagofie ma lona aulelei i le vaaiga i ona laufanua, e lē o suia o loo tumau pea.
O le tausaga e 2012 na toe afea ai Samoa e le tamaitai ma sa auai i le faamanatuina o le 50 tausaga o le Malo Tutoatasi.
O lona toe malaga mai i lenei tausaga, ua ia faailoa ai o le a atoa i le tausaga nei le 88 tausaga o lona soifua.
Ua faafetaia le alofa o le Atua o loo mafai pea ona malaga mai, ae o le a avea pea Samoa ma pele ia te ia, seia oo i lona taimi mulimuli i le lalolagi nei.
