E to‘a 22 faifeau ma o latou faletua na faauu mai i tofiga faafaifeau e pei ona molimauina i le faaiuga o le vaiaso na tea nei i Malua le laumua o le Aoga Faafaifeau a le Ekalesia Faapotopotoga Kerisiano Samoa. O i latou nei ua mafai ona faatautaia faamanatuga, o faaipoipoga faapea ai maliu.
O le tuutuuga o le avea ai ma faifeau faauuina, e mae‘a ona faauu mai i Malua ona agai loa lea o aoao nei ma o latou faletua i ekalesia i vaega eseese o le atunuu, ma o iina o loo galulue soosoo tau‘au ai ma faafeagaiga o aulotu ma o le mae‘a ai o le tausaga e galulue ai i tua ona faauuina loa lea e avea ma faifeau.
O nisi e agai sa‘o lava e tausi nuu ae e lei faauuina faafaifeau ae a oo i aso o faamanatuga, le Aso Sa muamua o le masina ona agai ane loa lea o faifeau faauuina o pulega ma faatino galuega nei mo i latou seia oo ina faauuina.
O faafeagaiga la ia na faauuina i le faaiuga o le vaiaso e aofia ai i latou ua tausi nuu ma i latou o loo tālia pea le valaauina i afioaga ma ekalesia e faatino ai le latou galuega.
O se sauniga na tumutumu atu i ai aiga ma uo i le molimauina aemaise foi o aulotu o pulega o loo iai i latou nei, ma na mae‘a i feiloaiga i maota o pulega sa faapea ona faamanuia ai taitai o aulotu i totonu o pulega e aofia ai ma a latou aulotu i taumafataga ma fiafia na faagasolo ai.
