E ese foi le lagona i le matamata ai i le ata o le Tulafale (the Orator) ina ua faalauiloa i fale tifaga mo le uluai taimi i Samoa nei. O le faamatalaga a le toatele maimau pe ana umi.
O le mau a nisi e iai vaega ua toso ai ae o le toatele lava i Samoa nei ua maimoaina le tulafale, ua matuā faafiafiaina. E lē gata o le ata o lea ua tuufaatasia ma pueina i le gagana Samoa ae o se ata ua toe to manatu ai foi i le tele o mataupu o loo laga mai ai.
O le alii o Tusi Tamasese na faatalatalanoa i le faato‘ā agai mai lava i Samoa e pueina le ata lenei, ma o se galuega na mautinoa lava e lē faigofie. Ae o lana faaaliga e ese le tāua o le faatino o le ata lenei i le gagana Samoa ma le nuu o Manunu ma ona siosiomaga lea na faaaogā e pueina ai vaega tele o lenei tifaga.
O lona manatu ua tuu i ana tusitusiga, ina ia mafai ona faalauiloa nisi o vaega tāua o tu ma aga faa-Samoa e lē malamalama i ai le toatele. O le tulafale i le amataga mai o le ata lenei e manino lava le faigata ona faaofi i lagona se alii puupuu saasaa e ave i ai ni tofiga faapenei.
E fai o le laitiiti o le numera o tagata pupuu faapea o umia ni tofiga nei ae o le vaai lava a tagata ona o le tulai mai o se tagata faapea, e lē mafai ona ia faia ni upu o se afioaga a o se aiga foi. E tele lava ina nini faatasi tagata nei ma tamaiti.
O le malosiaga atoa lava o le ata o le alii lenei, ua mafai ona vaai le tagata matamata i le olaga o le saa o Saili. E lē tautala, ae e mamafa ia te ia lona siosiomaga, lona puipuiga, o lona aiga ma lona fanua.
O lona toalua, le tamaitai o Vaaiga, o se tagata foi e matuā malosi lona sao i le aiga na mafuta ai, ua tuli ese ma lona ia aiga moni ma lona nuu ae e ui e lē o se tagata e faiuo, pe ulufale solo foi i le afioaga, ae e mautu ma malosi lona loto i le taumafaiga e manuia lona toalua ma lona aiga.
E tele vaega o le ata e te lē faalogoina ai ni talanoaga ae atonu o le leai o se faamatalaga e malosi atu se feau o loo sau ai nai i lo faamatalaga fai.
O le lē tautala foi o le alii o Saili na faigofie ai ona talia le lē amanaia o ia e avea ma tulafale.
E faigofie foi ona vaai i uiga faaalia o o tatou lava tagata faasaga i tagata e pei o Saili.
Ae e iai lava taimi o le ata e vaaia ai le malosi o le loto o lenei alii ma lona taumafai e tali atu i manaoga o lona toalua e ui ina lē amanaia ma vaai maualalo i ai le toatele o le nuu.
O le mafutaga faaleaiga e lē tele foi ni upu, ae o faamatalaga e fesootai ai ua lava lea e manino ai e mafana le mafutaga, e iai le faaaloalo i le va o le ulugalii, ma le va ma le la tama teine, o le va ma le aiga o le tina e ui ina tulai mai ai feeseeseaiga ae e manino lava le va fealoai o loo fusi ai le fesootaiga lea.
O le taualuga lava o lenei ata, o se vaega na fafau mai lava i le amataga, ma na mautinoa lava le faatalitali pe mafai e Saili ona fai se upu ma se faamatalaga, ma o le atoaga lea o le tofi faafaleupolu na talia pe mafai e lenei alii ona faatino.
Mo tagata Samoa lava ia, e lei iai se isi e lei ootia ina ua oo i le iuga o le ata tifaga, mo tagata na faamoemoe i le faaliliuga o le ata lenei, atonu e iai nisi o vaega e lē o malamalama ai ae e manino lava le itu lenei, o se tala e lē na o Samoa e faatatau i ai, ae o se ata o se mafutaga, e lē tele lava le tautala, ae e manino le alofa i faatinoga o galuega fai. A maua sou avanoa ae e te lei maimoa i ai, avane sau ata e te matamata ai.
