Tumau pea le lē mautonu o le Ekalesia i Samoa

E maumaututu le talitonuga o le Ekalesia Aso Fitu o le Toe Afio Mai, o le aso fitu o le vaiaso na malolo ai le Atua mai ana galuega o le Fofoaga. Ae o lē fea le aso e pa‘ū i ai le aso fitu i Samoa o se tulaga o loo vaeluaina ai pea le ekalesia.
I se tusitusiga talu ai nei a le peresetene aoao o le Ekalesia i le lalolagi, Elder Ted Wilson, o loo manino mai ai e pei ona iai se finagalo o sui o le ekalesia o loo tapuai pea i le Aso Toonai.
Peitai o se tulaga e lē o mautonu i se maitau a le toatele o le ekalesia ua lolotu nei i le Aso Sa talu ona aso faatasi Samoa ma Niu Sila ma Ausetalia.
O le tusitusiga na lomia i le aso 14 Setema ma faalauiloa i sui o le ekalesia i le lalolagi atoa o loo faaaogā ai e le peresetene ia Ted Wilson i ana saunoga le igoa o le Sapati aso fitu i le igoa o le aso, Aso Toonai, e aunoa ma le iai o se suiga mo atunuu e iai Toga, Kiripati, Uea ma Futuna, faapea ai ma Samoa lea ua tapuai i le Aso Sa e ese mai i le aso tapuai o le Ekalesia i le lalolagi atoa.
O le tulai mai o le lē mautonu i le aso tapuai o le Ekalesia Aso Fitu o le Toe Afio Mai, na mafua ona o le faaiuga a le pulega o le ekalesia i Samoa i le manatu ua sui e le Malo o Samoa le kalena ma sui ai ma igoa o aso ma ua faaigoa ai le aso fitu o le vaiaso o le Aso Sa.
I le polokalame o le Tagata Pasefika a le Televise a Niu Sila i le tausaga ua tea, na saunoa ai le taitai o le ekalesia i Samoa, Pastor Uili Solofa o loo faavae le faaiuga e suia lo latou aso tapuai ona ua avea ai nei le Aso Sa i Samoa ma ‘aso fitu’ o le vaiaso.
O lea mau sa faapea foi ona lomia i le Samoa Observer i le aso 1 Iulai o le tausaga ua mavae, O le tulaga ua iai nei i le tausia o le Sapati ua suia ai le Aso Toonai ae ua avea le Aso Sa ma aso e fitu i ai aso o le vaiaso.
O lenei faamatalaga e lē moni e pei ona faaalia e le Ofisa o Faamatalaga a le Malo lea sa faapea mai ai e leai se suiga i le uluai aso o le vaiaso i Samoa, o loo tumau pea i le Aso Sa.
O le mataupu lenei ua vaeluaina ai le Ekalesia Aso Fitu o le Toe Afio Mai e lē gata i Samoa e pei ona iai i latou o loo tumau pea ona tapuai i le Aso Toonai, ae ua faapea ai foi ona fesootai atu sui o le ekalesia mai vaega eseese o le lalolagi i le peresetene aoao o le Ekalesia ina ia toe suia le faaiuga sa faia e taitai i Samoa ma ia tapuai i le Aso Toonai, le aso fitu o le vaiaso ae lē o le Aso Sa.
I le taimi nei ua faatonuina e le Aumatutua o le ekalesia o loo taitai ai Ted Wilson le tuuina atu o le mataupu o le Sapati aso fitu i Samoa e suesueina e le ofisa o le ekalesia i le itulagi o le Pasefika i Saute.
Ae i le luasefulu ai nei o masina e lē o maua pea se tali o le gasegase o le ekalesia, ua tau manatu ai poo le tusitusiga a le peresetene ia Ted Wilson o se faailo faalelagi poo o loo agai sona finagalo i le tulaga lē mautonu e pei ona saunoa manino ai, “O le Aso Toonai, le Sapati, o le aso fitu o le vaiaso.”
I se pepa o tusitusia i le gagana Samoa o loo faaalia ai e Pastor Uili Solofa e faapea, “O le toatele o taitai o Ekalesia, tagata lotu ma nuu e lē o talanoa ma faapea ane ua fiafia o le a o atu le Ekalesia Asofitu e tausi le Aso Sa, ae o le latou gagana o loo gagana ai – O le a tatou o e tausi le Sapati o le Lotu Asofitu. Viia le Atua!”
O se isi tusitusiga o loo faapea mai ai Pastor Uili Solofa, “E tatau ona outou silafia o ekalesia Kerisiano uma i Samoa ua o latou faalauiloa faalauaitele o lea ua o latou tausia le Sapati aso fitu o le Tusi Paia.
E oo mai i le taimi nei e lē o mafai ona maua se faamaoniga ua iai ni saunoaga faapea a taitai o isi ekalesia i Samoa.
E matuā feteenai le mau a taitai o le Ekalesia Aso Fitu o le Toe Afio Mai i Samoa ma le talitonuga o ekalesia Kerisiano o loo tapuai i le Aso Sa le aso muamua o le vaiaso e faamanatu ai le toe tu manumalo o Iesu.
Peitai i le tusitusiga a le peresetene o le Ekalesia Aso Fitu o le Toe Afio Mai i le lalolagi o loo saunoa ai i le faatāuaina e isi ekalesia o le Aso Sa e manatua ai le toetu o Keriso.