“E leai se mea e atugalu ai le Itu agai”…sui Palemia
O loo faagasolo le lesitalaina o tagata palota i nuu ma afioaga o le atunuu lea o loo lesitala ai tagata ua aulia le 21 tausaga. O lalo o aiaiga o le tulafono o faigapalota o loo iai nei o loo lesitala ai i latou. O se galuega lenei sa faia foi i tausaga ua mavae e le ofisa o le Komesina o faigapalota ma o loo faaauauina pea.
Peitai ua iai se fuafuaga a le Malo i le palota o loo lumanai a le atunuu i le tausaga e 2016 o le a vaevae nisi o itumalo o loo lua nofoa e pei o le itumalo o Safata o loo avea ai le afioga Palusalue Faapo II ma faipule mo nofoa e lua o lea itumalo lea o loo seei ai le afioga Manu‘alesagalala Enokati Posala i le isi nofoa.
O itumalo nei a faatino a latou palota e lua e palota a le tagata pe lua sui e faia i ai le filifiliga. Peitai a oo nei ina vaelua o le a eseese loa, ma o le a tasi lava le faipule mo le itumalo lona uiga e tasi foi le sui o le a palota i ai se tagata palota ua lesitala faaletulafono.
O atugaluga o Palusalue ona o lona itumalo ua silia i le tolu afe le aofai o tagata palota. O le itu o le Alataua e pei ona ia faaalia e toaitiiti tagata ae o le isi itu o le itumalo e toatele ai tagata palota, o lona popolega pe faapefea ona vaelua nei ia tutusa ma talafeagai lelei le aofaiga o tagata palota.
E faapena foi se atugaluga o le tasi o faipule mo nofoa e lua o le itumalo o Salega le afioga Sooialo Dr Wood Salele. O le isi popolega o le taitai o le Itu agai e lei tuuina atu i le Palemene se tulafono e faatino ai le vaevaega o ia itumalo ma soloia ai le itumalo o le au palota taitoatasi ae o lea ua lesitala tagata palota. O le finagalo o le afioga i le sui palemia e leai se mea e popolevale ai le Itu agai.
O lona finagalo na folasia i tusitala afai o se itumalo faafaipule e lua nofoa o loo iai nei, a oo ina vaevae e tilotilo lava i le aofaiga o nuu ma tagata palota ona faatino lea i ai le galuega.
O le itu foi i le popole pe fia ni palota e fai o le tali faigofie e tasi lava le palota a le tagata e lē toe faia ni palota se lua e pei ona iai nei.
O le fuafuaga a le Malo e vaevae itumalo o loo tailua nofoa poo tofi faipule, o le a faatūina ai ma se itumalo faaopoopo mo le Vaimauga ma Faleata, lea o le a palota i ai tagata e leai ni piitaga i suafa matai ma eleele faaleaganuu o ia itumalo.
O se faaupuga faigofie o le a filifilia ai ni faipule e avea ma sui o tagata nofo lisi ma ua faatau fanua umia saoloto i totonu o ia itumalo aemaise foi o tagata mai isi vaega o le atunuu ua nonofo mau ai.
