Tofa Benji…

Na maligi loimata o le toatele na lagolagoina ma maofa i le taleni a le alii o Benji Mrshall i tausaga e sefulutasi o tautua ai i le West Tigers. I le taaloga ma le Warriors lea na faia‘ina ai le Tigers.
E ui o le taimi mulimuli lea o Marshall e taalo ai i le malae iloga o Leichard Oval lea na atoa ai foi ma le selau ivasefulufā o ana taaloga mo Wests ae talitonu nisi, afai e iai lava se avanoa e toe sao atu ai i le valu pito i luga a le Tiger, o le a avea lea ma meaalofa sili mo se tasi ua iloga lona sao i le ‘au.
E pei ona faamuta le konekarate na ia sainia ma le kalapu i le vaiaso talu ai, ae o taaloga o loo totoe o le tamilosaga o le a faatofa ai le aumaimoa i le tagata na sekia atoa le siamupini o le 2005. “O le taimi nei ou te lē o sainia se isi kalapu liki leaga ua ou tautino e muta la‘u taalo liki i le Tigers,” o se saunoaga lea a Marshall i luga o le Footy Show.
I le Ipu o le lalolagi i le 2008 e lē gata sa taulamua Benji i le faatoilaloina o Ausetalia i le suega siamupini, ae na sikoa foi mai se sasi ogaoga a Billy Slater.
Na siamupini Niu Sila ma o le tausaga nei o le a toe puipui ai la latou Ipu.
O le taaloga aupito faagalogata a Niu Sila ma Ausetalia (ANZAC) na faataunuuina i Brisbane i le 2010 o loo manatua pea.
E ta le logo ua mae‘a le taimi o loo sili Ausetalia ae peitai na osofai mai lava Benji mai la latou laina luasefululua ma fiu ai Ausetalia e talitali atu pasipasiga a Niu Sila ma manumalo ai Niu Sila ina ua uma le taimi.
O loo talotalo le aulagolago ia Benji o le a toe vaai i nisi vavega a le alii iloga i taaloga o totoe a o lei see atu i le Iuni. Ua vaaia foi le toatele mai o alo ma fanau a Samoa i le ‘au tele a le Tiger e pue gaioiga ma le faasoaina e Marshall o le laina i tua.
O i latou nei o le a fai ma lumanai o le West Tigers, lea e aofia ai David Nofoaluma, Tim Simona, Ava Seumanufagai ma Sauaso Su‘e. O se taimi muamua lenei ua totele ai tama Samoa i le West Tigers.