Atonu o le malosi o le sikalamu a le ‘au a Italia na faamoemoe e faatoilalo ai le malosi o le Manu Samoa, ae ona o le siamupini foi o le vavave o vae o tamaiti o le popo ma le malosi o le latou puipui mai, ua moni ai le pese, ‘tu tu a nimo’ faapena le ata na faatepa i ai e Paul Williams le ‘au a Italia i le 20 minute muamua o le ‘afa muamua o le taaloga, na laasia ai e Samoa le laina sikoa ma tatao i lalo o le pou, kiki i luma tonu o le pou ma ova lelei.
O le vevelaga mai lava lea o le Manu Samoa talu ona suipi i le ‘au a Sikotilani i le vaiaso na tea nei, lea la ua lelelele ai lava faapea ma faavavai ai foi ma Italia latou.
E ta ane le ‘afa o le taaloga o loo ‘ai silia pea le Manu Samoa 10 vs 3 Italia. E lei toe iai se taimi faamaimau a le Manu ina ua ta le ‘afa lona lua o le taaloga, lelei le puipui atu a le Manu Samoa, sina aa faataavalevale a lena, faasasa atu i le itu taumatau o le tulimanu e sikoa i ai le Manu Samoa na maua lelei ai lava e le alii o Alapati Leiua le polo, ua fiu lava Italia e toalua e tuli mai Leiua, ae leai ua sao atu lava ma tatao le sikoa lona lua a le Manu Samoa i le tulimanu.
E aga mālie foi le matamata i le taaloga lea a le tatou ‘au, auā e ui ina leai se autapuai Samoa i Aferika i le malae sa faatautaia ai le taaloga, peitai o le sikoa lava o le Manu Samoa, emo mai le TV o loo patipati fiafia le autapuai a Aferika mo si a tatou ‘au. O le faatamala lava ma sala e faasala ai le Manu Samoa i nai mea sese laiti o le taaloga na tau ‘ai ai si ‘au a Italia.
Peitai e lei leva lava ae toe faapipii foi apaau o le Manu, i le maitau atu i le itu ogatotonu o le malae na amata lelelele mai ai le vaalele a le alii o Johnny Leota ma sao atu ai lava, e ui e pei ni sauai le tino uumi o tagata na puipui atu, ae ua lē mafai lava le saoasaoa o Leota ma faasasa‘o atu i lalo o le pou, sikoa lona tolu mo le Manu Samoa.
O se vaaiga uigaese, le faatinoga sa iai le taaloga lea i le va o Italia ma le Manu Samoa, matagofie le sekiina o sikoa nei, e kilia lava lona faasoasoaina ma lelei le faatamoeina o le polo a le Manu Samoa.
O Taiasina Tuifua ma le faatini a Brando Vaaulu, o sikoa manino na e lua e lima i ai sikoa a le Manu Samoa, ae tasi le Penalty Try a le ‘au a Italia, iu ma le taaloga manumalo Manu Samoa 39-10 Italia.
O se fiafiaga sili lea i le maimoa a le autapuai, ua oo foi i luga o le upega o fesootaiga le Facebook, ua na o saafiafiaga lava mo le Manu Samoa o loo tusia ai, se mea ina a lelei ma le suamalie o le manumalo.
O le tama taalo o le taaloga lea na mauaina e le alii numera 2 a le Manu Samoa, Wayne Ole Avei. Ua moni lelei le faaiuga i le alo lea o Samoa, ona o se tasi lenei o tagata na mataina le taalo i le taaloga lea, aemaise o le malosi o lana taalo lagolagosua ma faaopoopo atu i le galuega fai faatasi ma le ‘au atoa, ua tulai mai ai le tatou ‘au i se tulaga lelei ma faafiafiaina ai si o tatou atunuu, manumalo sosoo o le tatou ‘au.
Momoli le faamalo ma faafetai i le Manu Samoa ona o le taalo malosi, taalo tausaafia, taalo faatamalii aemaise le lotonuu. Tatou talosia taaloga o totoe a si a tatou ‘au i le taamilosaga o loo faia nei.
O le tatou ‘au sa taaalo ma Italia:
15 James Sooialo, 14 Alapati Leiua, 13 Paul Williams(c), 12 Jonny Leota, 11 Alesana Tuilagi, 10 Tusiata Pisi, 9 Jeremy Sua, 8 Taiasina Tuifua, 7 Jack Lam, 6 Ofisa Treviranus, 5 Daniel Leo, 4 Teofilo Paulo, 3 Census Johnston, 2 Wayne Ole Avei, 1 Sakaria Taulafo.
Replacements: 16 Tii Paulo, 17 Logovii Mulipola, 18 James Johnston, 19 Kane Thompson, 20 Junior Poluleuligaga, 21 Brando Vaaulu, 22 Seilala Mapusua, 23 Piula Faasalele.
