Atonu ua matuā leai a se faitau o le tapuaiga a le atunuu, e mafai ona toe lele mai le Manu ma faavavai Sikotilani, i le mae‘a ai o le gau o lona apaau i le lami a Aferika i le la taaloga faatoa mae‘a atu.
Peitai ua faateia le tapuaiga i le po o le Aso Toonai na se‘i mavae nei, i le toe lele malosi mai o le Manu Samoa, i le osofai atu 15 minute muamua o le taaloga laasia ai le laina sikoa, James Sooialo ma le lua sikoa manino a Alesana Tuilagi.
O le faaiva ai lea ona fetaui o le Manu Samoa ma le ‘au a Sikotilani, tasi le taaloga tutusa, fitu manumalo o Sikotilani ma le taaloga muamua lea ua ea ai le pologa o si a tatou Manu Samoa ma manumalo ai i ‘ai 27-17. Masalo e lei manatu mamafa ia Sikotilani o se iuga lea e ono oo i ai, pe a fua atu i taaloga ua mavae, ae galo ai, e laitiiti a si Manu ae maini.
O le fitu minute muamua o le taaloga na osofai malosi mai ai le uigi taumatau a le Manu Samoa, Alapati Leiua, ma sao atu ai i le itu i taumatau o le itu e sikoa i ai le Manu Samoa, ae taofi mai e le ‘au a Sikotilani, pasi faatopetope loa ia James Sooialo ma faasasa‘o atu ai sikoa i le tulimanu, kiki lava e Sooialo ova, tau ‘ai muamua ai lea o le Manu Samoa.
Na maua ‘ai muamua a Sikotilani ina ua faasala le Manu Samoa le alii o Johnny Leota, ma aa ai e le kiki polo a Sikolani, Greig Laidlaw ma ova Sikotilani 3 vs 7 Samoa. Peitai e ui i le malosi o le puipui mai o Sikotilani, ae lei mafai ona taofia ai le malolosi o maso o tama taaalo, ina ua sekiseki lelei e Logovii Mulipola ma Taiasina Tuifua le pasiga, ma faase ai le puipuiga a Sikolani, pasi mamao ia Alesana Tuilagi, e lei toe maua e se palagi le fai rasta, tatao faalelei le polo i tua mai o le pou, kisi i le lima tusi, faapā i le muaulu ma faasino i le lagi.
Mataina le sikoa muamua lea a Tuilagi, tuu atu ia Sooialo kiki ova, maua ai ‘ai faaopoopo mo le Manu Samoa 14 vs 3 Sikotilani. E mae‘a ane le ‘afa muamua o le taaloga, o loo tumau pea Samoa i ‘ai 14 ae ua maua ‘ai faaopoopo mo Sikotilani i sala e lua na ova a Laidlaw, Sikolani 9.
Toe faasala foi le Manu Samoa i minute muamua o le ‘afa mulimuli, ma amata tau ‘ai ai Sikotilani, faatamala lava Sua Jeremy ua lusi ai le polo ma maua ai le avanoa e laasia ai e Sikotilani le laina sikoa mo le taimi muamua, Manu Samoa 14 vs Sikotilani 17.
Tau faapolepole le tapuaiga o lea ua toe tali mai le malosi o Sikotilani, o minute i luga o le laupapa 53 o le taaloga ae toe kiki e Sooialo le sala ma ova, tutusa ai lea i le ta‘i 17.
Na toe laasia e le Manu Samoa le laina sikoa, ma faasasa‘o atu lava Tuilagi i lalo tonu o le pou ma tatao loa ma le polo mo le sikoa lona tolu a le Manu Samoa, o se avanoa faigofie lea mo Sooialo, auā e leai lava ma se faigata o le kikiina o le polo i luma tonu o le pou ma ova, maua ai ‘ai faaopoopo mo Samoa, e ui i le finau malosi atu o Sikolani mo se latou avanoa e malo ai, peitai e lei tuumāmāina foi e le puipui malosi mai a le Manu, ma maua ai ‘ai Samoa 24 vs 17 Sikotilani.
Pe toe 10 minute o le taaloga o loo totoe, ae toe maua loa ‘ai e tolu faaopoopo mo le Manu Samoa, aaina e Sooialo ma manumalo ai loa mo le taimi muamua Manu Samoa 27 vs 17 Sikotilani.
O se talafaasolopito lea i le lakapi a Samoa, taimi muamua ua manumalo ai ia Sikolani, tele o taaloga sa na o le kolone lava, ae o lea ua ea le pologa, o se tala fiafia foi i soo se Samoa ma le tapuaiga ona o se tulaga maualuga ua ausia e le tatou ‘au.
O le a sauni nei le Manu Samoa e fetaui ma le ‘au a Italia i le faaiuga o le vaiaso, ae manatua, o se ‘au lelei tele foi le ‘au a Italia i le taimi nei, ma le fesili, faamata la e toe tatao sia tala manaia ua faafiafiaina ai le amataga o lenei vaiaso i le sauni atu i le taaloga ma Italia? Ia talosia ia taaloga uma o loo totoe.
O le ‘au a le Manu Samoa sa taaalo ma Sikotilani
1 Loosehead Prop MULIPOLA LOGOVII
2 Hooker AVEI WAYNE OLE
3 Tighthead Prop JOHNSTON CENSUS
4 Left Lock PAULO TEOFILO
5 Right Lock LEO DANIEL
6 Left Flanker TREVIRANUS OFISA
7 Right Flanker LAM JACK
8 Number Eight TUIFUA TAIASINA
9 Scrum Half SUA JEREMY
10 Fly Half PISI TUSIATA
11 Left Wing TUILAGI ALESANA
12 Left Centre LEOTA JOHN
13 Right Centre WILLIAMS PAUL (C )
14 Right Wing LEIUA ALAPATI
15 Full Back SOOIALO JAMES
Replacements:
16. Front Row Forward LEIATAUA MAATULIMANU FR
17. Front Row Forward TAULAFO SAKARIA FR
18. JOHNSTON JAMES FR
19. LEMALU FAATIGA
20. POLULEULIGAGA JUNIOR
21. VAAULU BRANDO
22. MAPUSUA SEILALA
23. FAOSILIVA ALAFOTI
