O le malaga taamilo ai o le aualuma a Letogo i Niu Sila nei ua tele ai ina toe faafofoga ma maimoa le toatele o nisi o le atunuu i fatuga tuai a le Fauula lea sa lauiloa ai Letogo i le vaitausaga o le 1970 i le 1980 lea ua tauau ina mou atu.
E 30 le aumalaga o loo i Aoteroa nei i le tolu vaiaso ona o le latou faamoemoe o le sailiga seleni auā se pa e sio ai le fanuatanu o le afioaga o loo i luga o le mauga ua faaigoaina o Malaefono o Lalotea.
O le afioaga o Letogo o se tasi lea alalafaga sa iai le latou tapu poo le tulafono e faasā ona tanu se tasi i lalo o le nuu, ae ave uma tagata i luga o le mauga i le mea o loo iai le fanuatanu, aepeitai ua maua atu nisi faamanuiaga a lea afioaga mai le malo e ala i fanua, o lea ua tele ai ina lagomau nisi o aiga i lalo o le nuu.
O le aualuma a tamaitai o loo nafa ma lea galue lelei o le faamamāina o le fanuatanu, ma ua a‘e ai se lagona i le mafutaga ua tatau ona fai se pa e sio ai le fanua ona ua tele ina faaleaga e manu papalagi o loo taaloa.
O le taeao o le Aso Toonai na matuā faatumulia ai le hall a le Ekalesia PIPC i Papakura i le mamalu o le atunuu, ae lē gata i lea o aiga, o paolo ma gafa o lenei afioaga sa lolofi atu e fia togi so latou maa auā le tauasa mamao mai o le aualuma ma le afioga i le faipule i le fia maua o se fesoasoani.
O le susuga le faifeau toeaina malolo ia Matavai Alefaio o le ekalesia PIPC i Papakura sa ia tatalaina le polokalame i le sauniga lotu ona amata lea o ipu a le aumalaga mai Samoa ma faasolo ai i ipu a aiga o le afioaga o loo alaala ma aumau i Niu Sila nei.
Sa lē tuua foi le valevale alofa o uo ma ē masani e ala ia latou foai sa tauala atu i nisi o le aumalaga aemaise o le mafutaga a le aualuma i Niu Sila. O nisi o alo ma tamafanau o lea afioaga o loo auamau i Hastings, sa malaga mamao mai lava ona o le fia galulue faatasi ma tuuina mai foi la latou meaalofa. O le susuga ia Tumua Tootoofoe Toetu sa fai ma fofoga o le aso ma o ia foi sa tu tootoo i taimi o faaaloaloga.
O le suifefiloi o le manogi o le lolo, o polokalame a le aualuma e ala ia latou faafiafiaga lea sa matuā sioa ai le toatele sa auai i faiga o siva ma pese na usu e le faili aemaise o siufofoga mālie o teine o le Fauula. O le afioga ia Lalotea Tuliaupupu sa nafa ma le aoina o lenei polokalame mai Samoa.
O le maualuga ma le matagofie o lea aso, o le galulue faatasi o le mafutaga a le aualuma a tamaitai a Letogo i Niu Sila ma nisi o alo ma tamafanau mai Ausetalia.
I le saunoaga a le afioga i le alii faipule ia Sulamanaia Fetaiai Tauiliili Tanuvasa na ia momoli ai lona agaga faafetai tele i le mafutaga a le aualuma a tamaitai i Niu Sila nei faapea ma Ausetalia, aemaise o paolo ma gafa a lenei afioaga faapea uo ma ē masani ona o le foai sa latou maau i ai lea ua maua ai le seleni e $60,000.00. Ae ina ua mae‘a le siva loa ma le faatau a le atunuu na tasi ai le faafitiga a leaga ua fai le fofoga o Lufilufi ia Manuo Failautusi Manuo ma sui o le auvalaaulia e momoli le agaga faafetai i le afioga i le faipule ma le mafutaga a le aualuma mai Samoa e tusa ai ma faaaloaloga o le aso, ma tatala ai loa le filialii.
O le Aso Toonai nei o le a toe faafiafia ai le aualuma mai Samoa i le latou koneseti e faia i le PIPC i Papakura.
