“O le a faapefea ona saili le faia o le amiotonu?”
Ua fā tagi o le palota ua tatala noanoataga ma ua ave i tua ona ua taunuu itu o loo aafia i se maliega. O ni maliega e lē o mafai ona iloa poo ā aiaiga pe na aafia ai ni tupe na ave e lē na faasaga i ai le tagi i lē na ia faaulu le mataupu.
Ua na o tala salatua lava o loo laumanu‘ia ai e faapea e tele le tupe na ave mo lē na tagi ina ua fausia se maliega i le toe aumai i tua o le mataupu.
O le tagi a Lafaitele Patrick Leiataualesa faasaga i le tamaitai faipule le afioga Aliimalemanu Alofa Tuuau e malolosi tuua‘iga o loo ta‘ua ai le ave o tupe e oo i le $2,000 tala. Fai mai le loia, le faletua o Iuni Sapolu sa la tauaveina le tagi ma lona alo le susuga Eliota Fuimaono Sapolu, e malolosi molimau e faamaonia ai moliaga o le tamaitai faipule.
O atugaluga o le alii loia o Eliota e faapea, ua mamafatu le avega na tauave e Lafaitele ma lona aiga i ona tuafāfine i le tauanau malosi a le nuu e ala mai i matai o le itumalo e toe faasolomuli le mataupu ae tuu loa le avanoa e faaauau ai le tofi faipule o Aliimalemanu.
O le finagalo o le alii loia na ia faaalia ai lona fiafia i le tulafono na pasia e le Palemene faasino i solitulafono o faigapalota ina ia maua se filifiliga e aunoa ma ni faiga piopio ma faaalatua e tulai mai ai.
Peitai o le manatu o Eliota o le malosi o sootaga faaleaiga ma le aganuu faasamoa ua faaaogā e toe soalaupule ai le mataupu ona o le naunau e taofi le tagi a Lafaitele ae ua lē faia ai manaoga o le tulafono na pasia e le Palemene.
O loo manino le tulafono e pei ona faaalia e le alii loia o loo faapea, o le tagata lava e tauva i se palota ae ona soli aiaiga o le tulafono faasino i ni faiga faaalatua ma piopio e leai se avanoa e toe faaauau ai ona ia umia le tofi pe a faamaonia e le faamasinoga moliaga.
O le fesili pe faapefea ona faailoa ni faiga piopio ma ni gaioiga faaalatua i se tulaga manino pe afai e toe iai se isi gaioiga e taumafai ai e taofi le faaauauina o se tagi o le palota. O loo laumanu‘ia tala o loo ta‘ua ai le aafia o faiga faapolokiki i le taumafai e taofi tagi o le palota a le atunuu na faia i le masina o Mati, ona o tagi uma o loo mafua mai i nisi o sui tauva o le HRPP e lei manuia faaasaga i sui ua manumalo ma ua umia tofi faipule o o latou itumalo.
O le lagona taatele afai na pasia e le Palemene tulafono ae toe taumafai e saili auala e taofia ai le faia o le amiotonu, o le ā la le mafuaaga na fausia ai tulafono?
Ua toe ave i tua le tagi a Lafaitele ina ua sainia se maliega a itu e lua. E lē o mafai ona faailoa poo ā aiaiga o le maliega pe o aofia ai se tupe e totogi atu e le tamaitai faipule i lē na faauluina le mataupu.
E mafua ona o aiaiga ia o le tulafono o soalaupulega poo le mediation. Ua na o itu lava e aafia latou te silafia, ae se‘i vaganā ua malilie uma e faailoa lautele ona faataunuu lea o se tulaga e faalauiloa ai le taunuuga o se soalaupulega.
O aiaiga nei o le tulafono o soalaupulega ua lē mafai ai ona faailoa le maliega i faasalalauga a nusipepa, televise ma leitio faapea upega tafailagi e maua ai faamatalaga o mea e tutupu.
