Tevita Li o North Harbour maua ile pue a Vince Aso ae na lua ana sikoa ile taaloga - Photo: Getty Images

Tevita Li o North Harbour maua ile pue a Vince Aso ae na lua ana sikoa ile taaloga – Photo: Getty Images

E matua matagā le mea ua oo iai le Iuni lakapi a Aukilani. Ua uma aso na tutasi ai le tootoo o Aukilani ile tumutumu ole Lakapi i Niu Sila. Ae ole maualalo ua oo iai na molimauina ile Aso Toonai ina ua faia’ina ia North Harbour 57-10. Ole lua ai lea o faia’ina, ae tasi le manumalo ile taamilosaga ole NPC ole 2017.

A’o le tulaga faigata, ole manumalo o North Harbour ile malae o Aukilani i Eden Park. Ole taimi muamua lea talu mai le 2001 ua faia’ina ai Aukilani ile ‘au a North Shore.

Na iai le faamoemoe ole Iuni a Aukilani ole 2017 ose tausaga e toe faafoi ai le malosi o Aukilani i lona tulaga masani. Ole 2016, na tulaga ono Aukilani ile NPC. Ae ole mala le mea oloo vaaia nei ile 2017, ua tolu taaloga ae lua faia’ina.

E le oni faia’ina i ‘au maualuluga ole taamilosaga e iai Waikato, Wellington, Otago poo Canterbury. Ae o faia’ina i ‘au laiti i totonu lava ole lio ale Auckland Blues, e iai Counties-Manukau (14-16) ma North Harbour (10-57). E laititi foi ‘ai na malo Aukilani ia Northland, e 10-8. O ‘au ia e tolu, o ‘au laiti ia na fai ma meataalo a Aukilani i tausaga ua mavae. Ae o lea ua fai ma sasa ile taimi nei mo le iuni na tu faamauga ile tele o tausaga ua mavae.

Ole malo ai o North Harbour ile sikoa lea, 57-10, ua fesuiai ai le malosiaga ole Auckland Blues mai ia Aukilani ile Iuni a North Shore. Ae maise ai le faia’ina ia Counties-Manukau, ma ai e lua na manumalo ai ia Northland.

A’o loma taaloga ma ‘au tetele ole NPC e iai le popolega ina nei tei ua see atu Aukilani ile Division 2. Ose tulaga au pito faigata lea pe afai e oo iai le Iuni.

Ose tulaga mamao tele lea mai le mea na masani ai. E faa 16 ona malo Aukilani ile NPC, ole tausaga mulimuli na malo ai ole 2009. E tele foi taimi na uu ai e Aukilani le Ranfurley Shield amata mai le 1902 ile 2007-08. E lei toe oo mai lava le talita ia Aukilani talu mai le 2008.

Ole taaloga a Aukilani ile Aso Toonai e pei ose taaloga lakapi pa’i a tamaiti a’oga. E foliga mai e leai ma se fausaga faamoemoeina e faatino ai le taalo a Aukilani. Ae e pule lava le tagata ia ile mea e tamoe iai.

E matautia le taalo a North Harbour na maua ai ana sikoa e fitu, ile tasi a Aukilani. E ta’i lua sikoa a Tevita Li ma le uigi o Shaun Stevenson. Lelei foi ma le a’a a Bryn Gatland na faaopoopoina ‘ai e 22 mai sala e fa ma kiki ova e sikoa e 5. E na’o le tasi le sikoa a Aukilani na maua e George Moala.

E leai ni taaloga faigofie a Aukilani o totoe. Ole vaiaso fou oloo faatali mai ai le ‘au malosi a Taranaki, o lea taaloga ole a fai lava i Eden Park sosoo ai ma le malaga o Aukilani i Invercargill e fetaui ma Southland.

A’o saili sona tulaga lelei mo le 2017, e ao ona toe tepa i tua i tausaga na tu maualuga ai le Iuni malosi i taimi na siamupini ai Aukilani.

Siamupini NPC a Aukilani: 1988, 1989, 1990, 1993, 1994, 1995, 1996, 1999, 2002, 2003, 2005, 2007.

Taimi na uu ai e Aukilani le Talita (Ranfurly Shield) 1902–1904 (0), 1905–1913 (23), 1934–1935 (1), 1952 (0), 1959 (2), 1960–1963 (25), 1965 (3), 1971 (1), 1972 (0), 1974–1976 (10), 1979 (6), 1985–1993 (61), 1995–1996 (3), 1996–1997 (6), 2003–2004 (2), 2007–2008 (5)

Faaiuga ole taaloga ole Aso Toonai

North Harbour 57 (Shaun Stevenson 2, Matt Duffie, Tevia Li 2, James Parsons, Ben Volavola Tatao; Bryn Gatland 4 sala + 5 a’a)

Auckland 10 (George Moala Tatao; John Hickey sala + a’a).

Comments

comments