Ua faapaia le 500 eka o eleele ole Malo i Tanumalala ole a fausia ai le falepuipui fou ma ua suaina foi i suo le eleele e faailoga ai le amatalia o galuega o lea galuega tele ale Malo. Ua fuafua e sefulu miliona ($10,000,000.00) le tau atoa ole falepuipui ma ose galuega ua maua foi le konekarate e faatinoina.
Ole Malo o Iapani ua fesoasoani e faatupe le fausia ole pa ole a sio ai le fanua atoa ole falepuipui fou. Ose nofoaga e mamao lava i uta e oso atu i fanua lisi ole Malo i Tanumalala oloo isi atinae manu papalagi a nisi oloo lisiina nisi vaega o lea fanua tele ole Malo.
Ole galuega lenei pe a maea na faailoa ele afioga ile Palemia susuga Tuilaepa L Sailele Malielegaoi ole 30 eka ole a fausia ai nofoaga mo le au nofosala ae ole isi vaega atoa ole fanua ole a fausia ai ni nofoaga e toe fuataina ai olaga o pagota e pei ole faia oni fale mo aoaoga ile tomai ile faia o faatoaga ma isi vaega e pei o lafumanu.
Ose vaega lenei ole saunoaga ale Palemia ile suaina ole eleele mo le amatalia o lea galuega : “Ole asō ua tatala aloaia ai le faamoemoe o lo tatou Malo o Samoa e auala ile Matagaluega o Falepuipui ma le Toefuataiga, ile fausiaina lea o nofoaga e ono (6) e nonofo ai pagota e avea ose vaega ole nofoaga fou ole Falepuipui i Tanumalala nei”. “Ole 30 eka o lenei 550 eka, ole a faaogaina mo le fausiaina ole falepuipui fou ae ole isi vaega ole fanua, ole a fuafua lea e faaogaina mo atinae faafaatoaga ma lafumanu faapea nisi o polokalame e faafaigaluega ai pagota oloo tuli o latou faasalaga faafalepuipui”. “Ma le faamoemoe ia oo atu ile taimi e magalo ai, ua iai nisi tomai faaopoopo latou te foi atu i aiga e faatino ae na afua atu ile nofoaga nei”.
“O lenei galuega ose atinae oloo faatupe mai ele tatou MaloTutoatasi o Samoa auā le malu puipuia ma le saogalemu o lo tatou atunuu ma le mataitūina ole vaaiga o tatou pagota oloo tuli o latou faasalaga. Ma ole isi lea faapogai taua ua tupu le tatou taulaga”.
“Ua tala mai le taulaga agai i Tafaigata, ae le se mea matagofie le tu ogatotonu ose toese ile mea e nonofo ai tagata i totonu ole taulaga. E le gata i lea, ae ua faaletonu foi fale oloo iai nei, ma e itiiti foi le laueleele”.
“O lenei galuega ua fuafuaina ile aofai atoa e 720 pagota e nofoia. E 480 le aofai o pagota ua tuli latou faasalaga i totonu o lenei nofoaga; 120 le aofaiga o pagota tamaitai e mafai ona nofoia totonu ole Falepuipui, ma le 120 le aofai o latou ua taofia e faatali ai le iuga o latou faamasinoga. O nei pagota ole a taofia e tusa ai ma le faavasegaina o lo latou puipuiga auā le malu puipuia o lo tatou atunuu i tulaga o puipuiga aupito maualuga”.
“Avea lenei avanoa e momoli ai le faafetai ile Malo o Iapani e tauala atu i lona Amepasa, Afioga Shinya Aoki, mo le faatupeina ole pa ina ia malupuipuia ma saogalemu le atunuu”. “Ou te talitonu e anoanoai nisi o tagata faigaluega mai le Auaunaga o Falepuipui ma isi Matagaluega ale Malo ma FaalapotopotogaTumaoti e iai o latou tomai ma agavaa sa fesoasoani tele i lenei atinae.
E momoli atu le faafetai tele ia te outou uma”. “E malosi lou lagona e mafai ona iai se sootaga lelei tatou te faia i soifua ma ola ole toatele o i latou ua faafalepuipui ina ia toe fuataiina ma ou te matuā faafetai ma fiafia ona o lea ole a fausia lenei galuega fou tatou te maua ai avanoa e tele e faataunuu ai lenei faamoemoe”.
“Ua ou talitonu ole galuega ua faataoto ile asō ole maatulimanu lea ole atinaeina ose vaitau fou mo le puleaina ma le faafoeina o pagota i totonu o Samoa a o avea ai i tatou ma taulamua ile Pasefika ile malupuipuia ma le toefuataina o pagota”.
“E momoli faafetai faapitoa ile Afioga ile Minisita faapea le lagolagosua ale Minisita Lagolago ile unaina malosi ole atinae. O laua tauau ua lafo iai le galuega lenei, ma le faamoemoe ole Kapeneta, e tatau ona uma lelei le galuega lenei, ae le i uma le paeaiga lenei. Manuia tele lenei aso”.
