Ole ‘oa ma le tamaoaiga o Samoa i lana gagana oloo saili malo ai i aogā eseese i totonu o Niu Sila, mai lava i fanau aogā laiti i totonu o aogā faataitai, seia oo lava i Iunivesite oloo iai alo ma fanau a Samoa.
Ae ole pito laau tonu lea oloo galulue ai le mafutaga a mātua ma faiaogā Samoa olo auai i totonu ole FAGASA, ole finauina lea o polokalame eseese e ala i tauvaga tautalaga faasamoa ale fanau i tausaga taitasi ina ia tapue ai pea lo latou fiafia e faaaogā le gagana Samoa e tautala ai i totonu o aoga ma aiga.
Ile tausaga nei o lea foi ua taoto se alāfua poo se polokalame tele a fanau aoga e ala ia latou tauvaga tautalaga faasamoa i Aukilani ile masina o Iuni, ae ole Aso Tofi muamua o Aokuso e faia ai le tauvaga lauga aoao i Ueligitone ale tausaga 5 ile tausaga 8 ma le Aso Faraile e faaiu ai ile tauvaga lauga ale vasega matutua mai le Vasega 9 e oo ile 13.
Ole naunautaiga oloo galulue iai le FAGASA i nei tauvaga tautalaga, ole taumafai lea e saili se manulauti e fonofono ma saili ai manatu ole fanau, ina ia iloa ona mulimuli ile paepaega ole lauga ina ia faigofie mo latou.
Ia iloa foi ele fanau ona iloa le paepaega lea ile taimi e tautala ai, auā ole mea lava lea e tasi e iloa uma lava e soo se Samoa ona tautala ai, e pei ole tautala ile upu faatulou ile atunuu.
E lē mafai foi ona faaaogāina ni upu maotua ile fanau, e fuafua lava upu e tatau ona faaaogāina ile matutua oloo iai ma ia malamalama foi iai.
Ole tāua o polokalame nei i tausaga taitasi, e vaai ai foi faiaoga ma mātua ile naunau o fanau e fia lauga ile taimi o tautalaga, auā ua pei ose mealololo ma se mea suamalie ia i latou pe a faalogologo iai, ae e lē o tuua ai foi le pito laau o faiaoga ile faatonutonu o fanau ina ia iloa lelei lana galuega oloo fai ile taimi ole tautalaga.
Ole FAGASA mai lona faavae, o soo se tagata lava e tatau ona iai, e lē na’o faiaoga, e auai ai foi mātua e galulue faatasi ma faiaoga e lagolagoina le faaaogāina ole gagana Samoa. Mai lava i Aoga Amata e oo ile iunivesite e auai uma lava ile FAGASA, e pei ose faamalu foi lea e ufiufi uma ai vaega o aoga, oloo mafai foi ele FAGASA ona lagolago ile SAASIA i Aoga Amata.
Ole tausaga ua mavae, na siitia ai le maualuga o aoga taitasi na auai ile vaiaso ole faatāuaina ole gagana Samoa, ma oloo tulimatai foi i lenei tausaga pe toatele nisi o aoga latou te faatāuaina lea faamoemoe.
Oloo taumafai nei foi le FAGASA e tuuina atu so latou leo i totonu o faalagamaea oloo faatalatalanoaina ai fuafuaga faataatitia i mea tau gagana i totonu o Niu Sila, aemaise so latou sao i totonu ole tapenaina o faiaoga i faamaumauga oloo iai, faatasi ai ma so latou fautuaga i mea oloo faataatitia ai nei le tapenaina o i latou ole a fai ma ta’ita’i poo pule aoga.
