Ua iai nei se tauvaga ua faatautaia e le Ofisa Faasalalau o le TVONE i Apia auā le faamanatu ai o le Aso Faapitoa o Tamā i lenei tausaga. O lea toe tasi le vaiaso oo atu i le Aso Sa o Tamā ae ua amata le faalauiloa e ese mai foi i isi tausaga.
O tausaga ua tuanai se masani ona fai ai tauvaga solo, o le tauvaga poo ai e maua lelei le leo o le Palemia ae o le tausaga lenei o lea ua agai sa‘o lava le faalauiloa e faatino e tamā galuega ua masani ai i le olaga lenei ona faasinosino i tamaitai poo tina o aiga.
O le vaega muamua la o le tauvaga o le faiga o le tagamea ma o tua o le Fale Samoa a le Pulega o Tagata Tafafao Maimoa mai i fafo, lea na agai atu ai tamā e faasino i tamaitai le mea e ta‘u o le fai o le tagamea i le lelei atoatoa ma le mamā e tatau ona iai ma le vave foi.
O se mafaufauga o le TVONE ma lana leitio le MAIFM 89.1 ona o le manatu afai o tamāe tele ina faasinosinolima iai i le leiloa fai se fe’au i le aiga ae na o le tele o le tautala, o lea la ua avatu le lu’i lenei i tama latou te agai ai i le paipa ma faasino mai pe mafai ona fai feau nei. E $2,000 tala le manumalo o lenei faalauiloa ma o le isi vaega o le tauvaga lenei ina ia agai ai tamā e fai le gasesega o taumafa. I Samoa lava ia e pei o feau lava nei e lua ua patino i le toatele o tina e ui ua tele foi suiga ua vaaia i lenei vaitaimi i ulugalii laiti ua tele lava ina vaaia tamā ua o latou faia le tagamea ma fai le meaai auā o le toatele lava o aiga, o tina poo tamaitai ia ua agai e faigaluega i galuega i ofisa, kamupani ma faalapotopotoga tuma‘oti i totonu o le atunuu.
E mālie foi le faatinoga o lenei tauvaga ma e lei tuumāmāina foi e le toatele o tamā na agai atu i Apia i lenei vaiaso mo le faatinoga o le vaega muamua lenei o lea tauvaga.
O loo lagolagoina lenei taumafaiga e le tele o kamupani i totonu o Apia ma o le auga lava ia maua se seleni a tamā latou i le faamanatu ai o lo latou aso faapitoa auā e fai lava si eseese o le faamanatuina o le Aso o Tina ma le Aso o Tamā lea foi e faitio ai lava le tele o tamā auā e fai o le tele o tauvaga ua faia i le Aso o Tina ae o le tele o meaalofa e maua e tina i lo latou aso, faaopoopo i ai ma le aso malolo e amanaia ai tina o le atunuu ae o le Aso o Tamā a leai lava ni faalauiloa faapenei e leai se isi e manatua.
O le isi foi faafitauli e ese le aso o tamā lea e faamanatu i Samoa i le vaitau lenei, lea e faamanatu faatasi ai ma Niu Sila ma Ausetalia, ae e ese foi le isi Aso o Tamā lea e faamanatu ma Amerika ia Setema, atonu o le mafuaaga foi lena o le lē soona agai o tina e faatino le faamanatuga o le aso o nai tamā i Samoa.
