O le onosai ma le mafutaga e faavae ia Iesu e puaina mai ai le alofa moni ma le lava silafia e le tasi o le isi.
O le mafutaga e lē mafai e faafitauli o le olaga ona lalaga pe momotu auā ua sautuatolu le maea ua fusia ai le aiga fou, ia Raymond ma Farida ma le Agaga Paia.
Ae o le faamoemoe sa fau ao fau po i aiganalua faapea le ulugalii fou, ina ia faataunuuina le Sakalameta o le faaipoipoga, e tua i ai le alofa faananau i le va o le ulugalii fou. O le sauniga sa faataunuuina lea i le Ekalesia o le Salvation For Freedom Church i Otahuhu.
O upu timai e fausia ai le faavae o le aiga fou na saunoa i ai le susuga i le faafeagaiga ia Sefulu Tuputala, faatasi ai ma lana faamanuiaga na ia saunoa ai, “Ia susulu atu le malamalama o le Atua ma ia iai ana faamanuiaga ia te oulua.”
Sa lē tuua ai alofaaga ma faamanuiaga molipo a aiganalua sa auai, faapea o la aiga mai Samoa, Ausetalia aemaise Niu Sila nei.
O tuaa o le alii faaipoipo o le susuga i le faafeagaiga ia Sefulu Tuputala ma le faletua ia Kirisimasi Tuputala mai le afioaga o Toamua ma Satui, ae o le tamaitai faaipoipo o lona tina o Tailoloto mai le afioaga o Faleasiu, ae o lona tamā o se alii mai le atunuu o Iran, e suafa ia Faribors Afsharfard.
