E tolu miliona lima selau afe Amerika le tau o le vaa la‘u uta ma pasese fou o le faalapotopotoga o vaa a Samoa le Samoa Shipping Corporation, ua taunuu mai ma o le a faaaogā mo le la‘uina o uta i le va o motu aemaise o malaga togipau o loo faaaogā ai vaa o le faalapotopotoga e isi motu tuaoi, aemaise o malaga togipau e masani ona faia mo Tokelau, le aga‘i i Manu‘a ma malaga togipau agai i le Atu Kuki.
O lea vaa fou o le fausaga o vaa e tutusa ma le vaa o le MV Fotu o Samoa. O le tofa Pipi Ioane Foma‘i na kapeteniina mai le vaa ua faaigoaina o le SSC FASEFULU ina ua tuua le atunuu o Meleisia mo Samoa lea e 25 aso na malaga mai ai. O le auvaa uma o alii seila mai Samoa e galulue foi i luga o vaa o le faalapotopotoga faatasi ai ma ni se alii inisinia ma se ofisa mai Meleisia.
Ua faaigoa le sa fou i le SSC fasefulu ona o le tausaga nei e atoa ai le 40 o tausaga talu ona faavaeina le faalapotopotoga o vaa a Samoa o se meatotino a le Malo o loo faagaioia malaga i le sami i le va o Upolu ma Savaii faapea malaga mai Apia i Pago Pago.
O le faaiuga o le masina nei e faatoa papatiso ai le Sa fou pe a faia se sauniga e faailoga ai le fasefulu tausaga ua laasia o le tautua a le faalapotopotoga o vaa a Samoa. Ua faaopoopo lea vaa fou i isi vaa o le faalapotopotoga e pei o le Fotu o Samoa, le Samoa Express, ma vaa tetele o Lady Samoa Lua ma le Tolu ma le Lady Naomi.
