(tatau ma le malofie)
O se mitamitaga i soo se tama tane ae mae‘a ona tāina sana tatau. E faapena foi i se tamaitai Samoa ae mae‘a ona tāina sana malu. O le Aso Toonai 3 o Ianuari na sama ai tatau a le toatolu o alo o Samoa na fananau i Niu Sila nei. E toalua o tatau; Salatielu Taotua (TJ), Shaun Tautali, faapea tamaitai na taina malu; Sina Ester Faitala, Jenny Fulisia Taotua ma Pepe Aufai Pio.
Na maua se avanoa e feiloai atu ai i le susuga i le tufuga ta tatau le afioga ia Salea Kasala Laei Sanele ma ia faailoa ai, na amata lana galuega i le tausaga e 2008, ma o loo ia faatinoina lenei faiva i Ausetalia ma malaga mai ai pe afai e manaomia e i latou i Niu Sila nei ni tatau.
Sa fesiligia se tasi o i latou na taina tatau pe aisea ua naunau ai e tali tiga o le ma‘ati‘ati o le au ma manao e ta le tatau. Ae tali o le naunau e fia maua pea le atamai i le aganuu a Samoa ma laei le tatau e pei ona manaia i la latou vaai i isi ua mae‘a ona ta tatau.
O se aso na ese ai foi le silasila a i latou na faatoa vaaia lea galuega o le samaga o tatau, ma latou fiafia ai e matau lenei measina a le atunuu o le samaga o tatau ma malofie. Aemaise le taimi na u‘u ai ao i le fuamoa ma le sama e le tufuga ma gaioi loa le aufaigaluega e u‘u tapatapa tatau ma tino atoa faaiila.
O nei alo na soifua a‘e i Niu Sila ma latou naunau pea e faatino aganuu a si o tatou atunuu. Ua ese le toatele foi o isi matai ma taulelea na soifua mai i Samoa peitai ua mamao lava le fiafia ma le naunau i nei tu ma aga ae ua sili lava le tafao faatama afakasi/palagi ma toe losi ane ai e fia maua mea nei ae ua tuai.
O le sauniga lotu na taitaia e le susuga ia Pastor Rapi Mariner a o le MC o le aso le fetalaiga ia Alailua E faamalo atu ai i le loto totoa o nei alii ma nei tamaitai e faataunuuina a latou miti ina ia laeiina le tatau ma le malu faasamoa moni.
Ua lē gata ai iina ae o le Aso Toonai na tea nei na faapea foi ona samaina ai tatau a isi alo o le atunuu na soifua ma fananau i Aotearoa nei; le auso tulafale o Seumanu Taotua Willie Robertson ma Taotua Namulauulu Iosua Robertson.
E ui o se afiafi faatimutimu ae lei faavaivai ai le toatele na valaaulia aemaise aiga e molimauina lenei galuega sa alo atu i ai le Matua o faiva ia Tavui Pasina Iosefo Ah Ken; o le mamalu lava lea i le susuga ia Su‘a ma le Falelua faapea le aiga Sa Su‘a ma le aufaigaluega.
O lenei sauniga faaleaganuu na mua lava le viiga i le Atua na taitaia e le susuga ia Pastor Afa Pulotu, ona sosoo ai lea ma le samaina o laei tatau. Na logo i tino matagi lelei i le folasaga a le Matua o Faiva i le faamaninoina o le mafuaaga e ala ai ona faaaogā le fuamoa e u‘u (sama) ai ao o le au taooto i tatau.
Na ia faamamafa i lagona fou e oo i le tagata e ta lana tatau. Manatua foi o le fuamoa lea e faamanatu pea e atunuu o papalagi e faatusa i ai le Eseta (Easter egg) ma le maliu o le Keriso ma toe tu mai.
O le faatusa o le ola fou ma le tagata fou. Lea foi la ua faaaogāina le fuamoa e u‘u ai i latou ua taina tatau ona ua fou o latou tagata ma lagona fou ina ua laei i le measina a Samoa e pei ona faamanino Tavu‘i Pasina Iosefo Ah Ken.
O le mae‘a ai o le sauniga na faafiafia ai loa Seumanu Willie ma Taotua Namulauulu Iosua Robertson i le la siva Samoa e faafiafia le auvalaaulia faapea aiga ma uo na auai e molimauina lo la faamoemoe ua taunuu manuia.
Sa sosoo ai ma le taliga o le sua i le taumafataga felanulanuai matagofie ma le lasi na tofusia ai le aofia ma totoe ona o le anoanoai o kuka eseese.
Na faaiila ai foi le lafolafo a le fetalaiga ia Taotua Namulauulu Iosua i se vagana logoleleia ma le talia gofie e le valaaulia le laupaega o mamalu o le aso faapea tulaga faalupeina o le Matua o Faiva, ona ua talafeagai lava ma le tatau lea ua ta.
Na faapea foi ona fetalai faafetai le fetalaiga ia Seumanu Taotua Willie Robertson mo le Matua o faiva ma le susuga i le faafeagaiga aemaise le tapuaiga a aiga ma uo, a o alo faiva i le faatinoina o la laei Samoa. Na faaopoopo le tuaa o nei tulafale le afioga ia Tupai poo le fetalaiga foi ia Taotua Lopati Robertson ma alo ai loa i faaaloaloga na faafoeina e Taotua Namulauulu Iosua Robertson aua se ‘afu o le tufuga ma le meanai tāua faapea faafeagaiga ma le mamalu o malo faaaloalogia.
Na matagofie le faafoega o le polokalame e le tausi ia Iva Robertson lē sa fai ma fofoga o lea aso taupoina. Ma o se itu mataina lea i le faafofoga a le auvalaaulia ona o nei alo o Samoa na ola a‘e i Niu Sila ae o le matuā lelei tele o le gagana Samoa na latou fetalai ma gagana ai i lea aso.
E faamalo ma faafetai atu ai sui o le tatou nusipepa i nei alo o Samoa ma lo latou naunau e faaolaola le gagana ma tu ma aga faasamoa i atunuu ese. Alo ia i o outou faiva o outou māmā na!
