E toatele lava alo ma tamafanau o loo saili malo i totonu o nei atunuu e le gata o pisinisi ae faapea foi totonu o ekalesia.
E iai lava foi alagaupu a le atunuu e a le una e tausii ae tigaina ai le atiigi auā e iai a nisi e faia mea lelei e tautua ai aiga, nuu, ekalesia ma le atunuu, ae o isi foi e faifai peitai o le faamalosi ia i latou nei o saili malo ma faaaogā taleni mai le Atua, ia aua lava ne‘i manatu i le pola e motu mai tua ae tamoe punouai i luma ma faamoemoe i le Atua e manuia ai.
O le Aso Toonai aso 5 Iulai 2014 na tatala aloaia ai se tasi o faleinisinia atoa ai ma le panel beater and paint ua faaigoaina o le FAB BOY CUSTOMY i Kingston Logan City, a se tasi o tamafanau mai le alalafaga o Faala Palauli.
O le alii talavou o Liahona Gaga‘e Lagaaia. O mātua o Liahona o le tausi ia Pulusila, faapea lona tamā o Logo Gaga‘e Lagaaia mai lava i Faala Palauli.
E toafā nisi o alo Samoa ma se alii Tonga e toatasi o le a galulue ma Liahona e amataina o lana fale inisinia. O se saunoaga a Liahona na ia faapea ai o lona tomai sa ia maua mai lea i lona uncle ua maliu le afioga ia Laulu Moana Ah See, faapea lona cousin o Luavale Ah See. Sa momoli lona agaga faafetai i ona aiga uma mo le faamalosi ia te ia ua tau ai lau o lona faamoemoe.
