‘O le manuia sa lilo.’ O manatu ma lagona ia o mātua o le tamaitai o Vitolia Natasha Nansen o Panmure, ina ua faauuina mai le Iunivesite o Aukilani, i lona faailoga o le Master of Architecture Professional with Honours.
O Natasha o le alo o le susuga Viliamu Tualasea Lio Nansen mai Aleisa, Leauvaa ma Levi Saleimoa, ma le tina ia Naomi Afamasaga Fia o Fasitootai.
‘O lē ua fiafia inā pese ia. O le viiga i le Atua i mea aupito aluga ma le manuia i lē ua alofagia o ia.’
Malo tauivi, malo faaea aiga, faaea atunuu, ua tau lau o lou faamoemoe.
Ua e sii foi le fale i le mauga, auā o le faatumutumuga ma le taunuuga lea o le olaga o le tagata a‘oa‘oina.
Ia e alofa i le aiga, tumau i le fealofani ma toaga i le lotu. Alofa atu lou uso o Jo, lou tuagane o Brandon, ou aiga i Niu Sila, Ausetalia, Samoa, ae sili alofaaga o lou Grandma, Late Vitolia Tualasea Lio Nansen mai Samoa.
